ഉത്തർപ്രദേശിൽ ‘ജനാധിപത്യത്തിന്റെ വിശുദ്ധ ഉത്സവ’ത്തിന് തുടക്കം: എല്ലാവരും കൊറോണ മാനദണ്ഡങ്ങൾ പാലിച്ച് പങ്കെടുക്കണമെന്ന് പ്രധാനമന്ത്രി

ലക്‌നൗ: ഉത്തർപ്രദേശിൽ ആദ്യ ഘട്ട വോട്ടെടുപ്പ് ആരംഭിച്ചിരിക്കെ എല്ലാവരോടും തങ്ങളുടെ വോട്ടവകാശം വിനിയോഗിക്കണമെന്ന് ആവശ്യപ്പെട്ട് പ്രധാനമന്ത്രി നരേന്ദ്രമോദി. ജനാധിപത്യത്തിന്റെ വിശുദ്ധ ഉത്സവത്തിൽ എല്ലാവരും പങ്കെടുക്കണമെന്ന് പ്രധാനമന്ത്രി പറഞ്ഞു. ട്വിറ്ററിലൂടെയാണ് പ്രധാനമന്ത്രിയുടെ പ്രതികരണം.

പ്രധാനമന്ത്രിയുടെ വാക്കുകൾ ഇങ്ങനെ ‘ ഉത്തർപ്രദേശ് നിയമസഭാ തിരഞ്ഞെടുപ്പിന്റെ ആദ്യഘട്ട വോട്ടെടുപ്പാണ് ഇന്ന്. എല്ലാ വോട്ടർമാരും കൊറോണ മാനദണ്ഡങ്ങൾ പാലിച്ച് ജനാധിപത്യത്തിന്റെ ഈ വിശുദ്ധ ഉത്സവത്തിൽ പങ്കെടുക്കണം’ അദ്ദേഹം ട്വിറ്ററിൽ കുറിച്ചു.

ഉത്തർപ്രദേശിൽ 11 ജില്ലകളിലെ 58 നിയോജക മണ്ഡലങ്ങളിലേക്കുള്ള വോട്ടെടുപ്പാണ് ആരംഭിച്ചത്. രാവിലെ ഏഴ് മണിയോടെ തന്നെ പോളിംഗ് ആരംഭിച്ചിരുന്നു. ഈ ഘട്ടത്തിൽ ഒൻപത് മന്ത്രിമാരടക്കം 623 സ്ഥാനാർത്ഥികൾ ജനവിധി തേടുമ്പോൾ രണ്ട് കോടി 27 ലക്ഷം വോട്ടർമാരാണ് വിധിയെഴുതുന്നത്.

എല്ലാ പോളിംഗ് ബൂത്തുകളിലും സുരക്ഷ ശക്തമാക്കിയിട്ടുണ്ട്. തെരഞ്ഞെടുപ്പ് നടക്കുന്ന മണ്ഡലങ്ങളിലായി 50,0000 അർദ്ധ സൈനികരെയാണ് വിന്യസിച്ചിരിക്കുന്നത്. സുരക്ഷാ ക്രമീകരണങ്ങൾക്ക് ശക്തി പകരാൻ പോലീസിനേയും വിന്യസിച്ചിട്ടുണ്ട്.