ഡെറാഡൂൺ: ഉത്തരാഖണ്ഡിൽ വീണ്ടും അധികാരത്തിലെത്തിയാൽ ഏകീകൃത സിവിൽ കോഡ് സംസ്ഥാനത്ത് നടപ്പിലാക്കുമെന്ന മുഖ്യമന്ത്രി പുഷ്‌കർ സിംഗ് ധാമിയുടെ പ്രഖ്യാപനത്തെ അഭിനന്ദിച്ച് അനുരാഗ് ഠാക്കൂർ. തെരഞ്ഞെടുപ്പിൽ വിജയിച്ച് സത്യപ്രതിജ്ഞ ചെയ്താലുടൻ ഏകീകൃത സിവിൽ കോഡ് നടപ്പിലാക്കാൻ വേണ്ട നടപടികൾക്ക് തുടക്കമിടുമെന്ന് ഉത്തരാഖണ്ഡ് മുഖ്യമന്ത്രി ഇന്ന് പ്രഖ്യാപിച്ചിരുന്നു. ഇതിന് പിന്നാലെയാണ് പ്രതികരണവുമായി കേന്ദ്രമന്ത്രി അനുരാഗ് ഠാക്കൂർ രംഗത്തെത്തിയത്.
പുഷ്‌കർ സിംഗ് ധാമിയുടെ പ്രഖ്യാപനം അഭിനന്ദനാർഹമാണ്. ഇത്തരമൊരു നടപടിക്ക് മുതിരുന്നതിന് അദ്ദേഹത്തോട് നന്ദി പറയുന്നു. വീണ്ടും അധികാരത്തിലേറിയാൽ എത്രയും വേഗം പ്രഖ്യാപനം നടപ്പിലാക്കണമെന്നാണ് അദ്ദേഹത്തോട് ആവശ്യപ്പെടാനുള്ളതെന്നും വാർത്താവിതരണ പ്രക്ഷേപണ വകുപ്പ് മന്ത്രി അനുരാഗ് ഠാക്കൂർ അറിയിച്ചു.
ബിജെപി വീണ്ടും ഭരണം നേടിയാൽ ഏകീകൃത സിവിൽ കോഡ് നടപ്പിലാക്കുന്നതിന് ആവശ്യമായ ഡ്രാഫ്റ്റ് തയ്യാറാക്കാൻ പാനലിനെ നിയോഗിക്കും. ഇതോടെ എല്ലാ ജനങ്ങൾക്കും ജാതിമതവ്യത്യാസമില്ലാതെ ഒരേ നിയമം ബാധകമാകും. ഈ പ്രഖ്യാപനം ബിജെപിയെന്ന തന്റെ പാർട്ടിയുടേതാണെന്നും ദേവഭൂമിയായ ഉത്തരാഖണ്ഡിന്റെ സംസ്‌കാരവും പൈതൃകവും നിലനിർത്തുകയെന്നത് ബിജെപിയുടെ കടമയാണെന്നും ധാമി പ്രതികരിച്ചിരുന്നു. വിവാഹം, വിവാഹമോചനം, പിന്തുടർച്ചാവകാശം എന്നിവയ്‌ക്ക് എല്ലാ മതസ്ഥർക്കും യൂണിഫോം സിവിൽ കോഡിലൂടെ ഒരേ നിയമം ബാധകമാക്കുമെന്നും ധാമി പറഞ്ഞു.
Comments