തുമ്പ കടപ്പുറത്ത് ഭീമൻ സ്രാവ് കരക്കടിഞ്ഞു: തിരിച്ചയക്കാനുള്ള നാട്ടുകാരുടെ ശ്രമം പരാജയം, സ്രാവ് ചത്തു

തിരുവനന്തപുരം: തുമ്പ കടപ്പുറത്ത് ഭീമൻ സ്രാവ് കരയ്‌ക്കടിഞ്ഞു. ദേഹത്ത് വല കുരുങ്ങിയ നിലയിലാണ് സ്രാവ് കരക്കടിഞ്ഞത്. കരയ്‌ക്കടിയുമ്പോൾ സ്രാവിന് ജീവനുണ്ടായിരുന്നു. സ്രാവിനെ ശ്രദ്ധയിൽപ്പെട്ടതോടെ മത്സ്യത്തൊഴിലാളികൾ കടലിലേക്ക് തിരിച്ച് വിടാനുള്ള ശ്രമം നടത്തിയെങ്കിലും ചാവുകയായിരുന്നു. ഇതിന് രണ്ട് ടണ്ണോളം ഭാരംവരുമെന്ന് മത്സ്യത്തൊഴിലാളികൾ പറയുന്നു.

ഇന്ന് ഉച്ചക്ക് രണ്ട് മണിയോട് കൂടിയാണ് സ്രാവ് കരക്കടിഞ്ഞത്. സ്രാവിന്റെ ദേഹത്ത് കുരുങ്ങിയ വല മീൻപിടിത്തത്തിനിടയിൽ കുരുങ്ങിയതല്ലെന്നാണ് വിവരം. വല നീക്കിയ ശേഷം സ്രാവിനെ തിരികെ കടലിലേക്ക് അയക്കാൻ മത്സ്യത്തൊഴിലാളികൾ ശ്രമം നടത്തിയെങ്കിലും ഫലം കണ്ടില്ല. ചെകിളയിൽ മണൽ കയറിയതിനെ തുടർന്ന് കരയ്‌ക്കടിഞ്ഞ് അല്പം കഴിഞ്ഞ് ചത്തു.

ജീവനോടെ സ്രാവ് കരക്കടിഞ്ഞിരിക്കുന്നത് അപൂർവ്വമാണെന്ന് നാട്ടുകാർ പറയുന്നു. നേരത്തെ ചത്ത സ്രാവുകൾ പലയിടങ്ങളിലും കരക്കടിഞ്ഞിട്ടുണ്ടെങ്കിലും ഇത്തരത്തിൽ ഒരു സംഭവം അപൂർവമാണെന്ന് മത്സ്യത്തൊഴിലാളികളും പറയുന്നു. കരയിൽ കുഴിച്ചിടാനായി നാട്ടുകാർ കഠിനംകുളം ഗ്രാമപഞ്ചായത്തിൽ അറിയിച്ചിട്ടുണ്ട്. കൂറ്റൻ സ്രാവിനെ കാണാനായി പ്രദേശവാസികൾ തീരത്തേയ്‌ക്ക് എത്തി.