തിരുവനന്തപുരം: സംസ്ഥാനത്ത് ഒന്ന് മുതൽ ഒൻപത് വരെയുള്ള ക്ലാസുകളിലെ അദ്ധ്യയനം പുരാരംഭിച്ചപ്പോൾ, 82 ശതമാനം കുട്ടികളും സ്കൂളിൽ ഹാജരായതായി വിദ്യാഭ്യാസമന്ത്രി വി.ശിവൻകുട്ടി. ഫെബ്രുവരി 19 വരെ ബാച്ച് അടിസ്ഥാനത്തിൽ ഉച്ചവരെ ആയിരിക്കും അദ്ധ്യയനം എന്ന് മന്ത്രി അറിയിച്ചു.
സംസ്ഥാനത്ത് പ്രീ-പ്രൈമറി ക്ലാസ്സുകളും ഇന്ന് ആരംഭിച്ചു. കൊറോണ നിയന്ത്രണങ്ങൾ വന്നതിനുശേഷം ആദ്യമായാണ് പ്രീ-പ്രൈമറി ക്ലാസ്സുകൾ ഓഫ്ലൈനായി ആരംഭിക്കുന്നത്. ഓരോ ദിവസവും 50 ശതമാനം കുട്ടികൾ ഉച്ചവരെ അദ്ധ്യയനം എന്ന നിലയിലാണ് പ്രീ-പ്രൈമറി ക്ലാസ്സുകൾ പ്രവർത്തിക്കുന്നത്. സംസ്ഥാനത്താകെ ഇന്ന് വരേണ്ടിയിരുന്നവരിൽ 65 ശതമാനം കുട്ടികൾ ക്ലാസ്സുകളിൽ എത്തിച്ചേർന്നിരുന്നു എന്ന് വി.ശിവൻകുട്ടി വ്യക്തമാക്കി.
ഫെബ്രുവരി 21 മുതൽ 1-9 വരെയുള്ള ക്ലാസ്സുകളിലെ മുഴുവൻ കുട്ടികളെയും ഉൾപ്പെടുത്തി രാവിലെ മുതൽ വൈകുന്നേരം വരെ ക്ലാസ്സുകൾ നടത്തുന്നതിനുള്ള മുന്നൊരുക്ക പ്രവർത്തനങ്ങൾ സ്കൂളുകളിൽ ആരംഭിച്ചിട്ടുണ്ടെന്ന് മന്ത്രി കൂട്ടിച്ചേർത്തു. കൊറോണ മാനദണ്ഡങ്ങൾ പാലിച്ച് അദ്ധ്യയനം മുന്നോട്ട് പോകുമെന്ന് മന്ത്രി വ്യക്തമാക്കി.
