രണ്ടരവയസുകാരിയുടെ ആരോഗ്യനില; കണ്ണു തുറന്നു; സംസാരിക്കാനാകുമോ എന്ന് സംശയം; പുരോഗതി ഉണ്ടെന്ന് ആശുപത്രി അധികൃതർ

കൊച്ചി: തൃക്കാക്കരയിൽ പരിക്കേറ്റ രണ്ടരവയസുകാരിയുടെ ആരോഗ്യനിലയിൽ പുരോഗതിയുണ്ടെന്ന് ആശുപത്രി അധികൃതർ.പനിയോ അപസ്മാരമോ മറ്റോ ഉണ്ടായിട്ടില്ല.ഒടിവുള്ള ഇടതുകൈ ഒഴികെ മറ്റ് കൈകാലുകൾ ചലിപ്പിക്കുന്നുണ്ട്. മുഴുവൻ സമയവും കുഞ്ഞ് കണ്ണുകൾ തുറന്ന് തന്നെയാണ് കിടക്കുന്നതെന്ന് ഡോക്ടർമാർ പറഞ്ഞു.

വായിലൂടെ തന്നെയാണ് കുഞ്ഞിന് ആഹാരം നൽകുന്നത്. എന്നാൽ എഴുന്നേറ്റു നിൽക്കാനോ ശബ്ദിക്കുവാനോ ഇതുവരെയും കഴിഞ്ഞിട്ടില്ലെന്ന ആശങ്കയുമുണ്ട്. സംസാരശേഷിക്ക് തകരാറുണ്ടാകാനുള്ള സാധ്യത തള്ളിക്കളയാനാകില്ലെന്നും ഡോക്ടർമാർ കൂട്ടിച്ചേർത്തു.

അതേസമയം, കുട്ടിയ്‌ക്ക് മർദ്ദനമേറ്റതിൽ ദുരൂഹത തുടരുകയാണ്. കുട്ടി സ്വയം പരിക്കേൽപ്പിച്ചുവെന്നാണ് അമ്മ ഉൾപ്പെടെയുള്ള ബന്ധുക്കൾ പറയുന്നത്. മകളെ ആരും ഉപദ്രവിച്ചതല്ലെന്ന് കുട്ടിയുടെ അമ്മ പറയുന്നത്. ടിജിൻ മകളെ അടിക്കുന്നതായി താൻ കണ്ടിട്ടില്ല. മകൾക്ക് സാധാരണ കുസൃതിയാണ് ഉണ്ടായിരുന്നത്. എന്നാൽ കഴിഞ്ഞ കുറച്ച് നാളായി അസാധാരണമായ പെരുമാറ്റമാണെന്ന് കുട്ടിയുടെ അമ്മ പറയുന്നു.കഴിഞ്ഞ ദിവസം കുഞ്ഞിന്റെ അമ്മയും അമ്മൂമ്മയും കൈഞരമ്പ് മുറിച്ച് ആത്മഹത്യയ്‌ക്ക് ശ്രമിച്ചിരുന്നു.