ലക്‌നൗ : മാഫിയ ഡോൺ മുക്താർ അൻസാരിയുടെ മകൻ അബ്ബാസ് അൻസാരിയ്‌ക്കെതിരെ കേസ് എടുത്ത് പോലീസ്. പോലീസുകാർക്കും, സർക്കാർ ഉദ്യോഗസ്ഥർക്കുമെതിരെ പരസ്യമായി ഭീഷണി മുഴക്കിയതിനാണ് കേസ്. ഭീഷണി മുഴക്കിക്കൊണ്ടുള്ള അബ്ബാസ് അൻസാരിയുടെ വീഡിയോ സമൂഹമാദ്ധ്യമങ്ങളിൽ വ്യാപകമായി പ്രചരിച്ചിരുന്നു. ഇതേ തുടർന്ന് പോലീസ് സ്വമേധയാ കേസ് എടുക്കുകയായിരുന്നു.
യുപി നിയമസഭാ തെരഞ്ഞെടുപ്പിൽ സുഹെൽദേവ് ഭാരതീയ സമാജ് പാർട്ടി സ്ഥാനാർത്ഥിയായി അബ്ബാസ് അൻസാരി മത്സരിക്കുന്നുണ്ട്. തെരഞ്ഞെടുപ്പ് പ്രചാരണത്തിന്റെ ഭാഗമായി മവു ജില്ലയിൽ സംഘടിപ്പിച്ച പ്രചാരണ പരിപാടിയിലാണ് അബ്ബാസ് അൻസാരിയുടെ ഭീഷണി. സമാജ്‌വാദി പാർട്ടിയുമായി സഖ്യം ചേർന്നാണ് സുഹെൽദേവ് ഭാരതീയ സമാജ് പാർട്ടി മത്സരിക്കുന്നത്.
സമാജ്‌വാദി പാർട്ടി അധികാരത്തിലേറിയാൽ നിലവിലെ ഉദ്യോഗസ്ഥർക്ക് പെട്ടെന്ന് ട്രാൻസ്ഫർ നൽകരുതെന്ന് താൻ അഖിലേഷ് യാദവിനോട് ആവശ്യപ്പെട്ടിട്ടുണ്ട്. ആറ് മാസത്തിന് ശേഷം മതി ട്രാൻസ്ഫർ എന്നാണ് താൻ പറഞ്ഞിരിക്കുന്നത്. അവരുമായി തനിക്ക് ചില കണക്കുകൾ തീർക്കാനുണ്ട്. ഇതിന് ശേഷം മാത്രമേ ട്രാൻസ്ഫർ സർട്ടിഫിക്കറ്റുകൾ തയ്യാറാക്കുകയുള്ളൂ എന്നായിരുന്നു അബ്ബാസ് അൻസാരിയുടെ ഭീഷണി.
Comments