മുംബൈ: വാഹനപ്രേമികൾക്ക് പുത്തൻ പ്രതീക്ഷകൾ നൽകിയാണ് മാരുതി സുസുക്കി പുതുവർഷത്തിലേയ്‌ക്ക് കടന്നത്. നിർമ്മാതാക്കളുടെ വാഗ്ദാനം പോലെ ഇതാ ബലെനോയുടെ ഫേസ് ലിഫ്റ്റ് പതിപ്പും അവതരിപ്പിച്ചു കഴിഞ്ഞു. ഇനിയും മാരുതി കൊളുത്തിയ സർപ്രൈസ് വെടിക്കെട്ട് അവസാനിച്ചിട്ടില്ല. വാഹനപ്രേമികൾക്കായി ബ്ലോക്ക്ബസ്റ്റർ ഏപ്രിലിന്റെ തയ്യാറെടുപ്പിലാണ് മാരുതി സുസുക്കി. നിർമ്മാതാക്കളുടെ ഏറ്റവും ജനപ്രിയ മോഡലുകളായ എർട്ടിഗയുടെയും എക്സ്എൽ6ന്റെയും ഫേസ് ലിഫ്റ്റ് പതിപ്പുകളാണ് മാരുതി സുസുക്കി ഏപ്രിലിൽ പുറത്തിറക്കുന്നത്.
ഫോഗ് ലാമ്പ് ഗ്രില്ലും ബ്ലാക്ക് സറൗണ്ടും പോലുള്ള ചെറിയ നവീകരണങ്ങളൊഴിച്ചാൽ, എർട്ടിഗയുടെ ഫേസ്ലിഫ്റ്റ് പതിപ്പിന് ഡിസൈനിലും സ്‌റ്റൈലിംഗിലും വലിയ വ്യത്യാസങ്ങൾ ഉണ്ടായേക്കില്ല. അലോയികൾക്ക് പുത്തൻ ഡിസൈൻ ലഭിച്ചേക്കും. എക്സ്എൽ6ലും സമാനമായ നവീകരണങ്ങളാണ് പ്രതീക്ഷിക്കുന്നത്. പുതിയ കളർ ഓപ്ഷനുകൾ ഇരു വാഹനങ്ങൾക്കും നൽകിയേക്കുമെന്നാണ് റിപ്പോർട്ടുകൾ പുറത്തുവരുന്നത്.
രണ്ട് കാറുകൾക്കും ടച്ച്സ്‌ക്രീൻ ഇൻഫോടെയ്ൻമെന്റ് സിസ്റ്റത്തിന്റെ നവീകരണം ലഭിച്ചേക്കും. 2022 ബലെനോയിൽ ആദ്യമായി അവതരിപ്പിച്ച സ്മാർട്ട്പ്ലേ പ്രോ പതിപ്പ് ഉപയോഗിച്ച് മാരുതി രണ്ട് കാറുകളും അപ്ഡേറ്റ് ചെയ്യാൻ സാധ്യതയുണ്ട്. ഇതുകൂടാതെ, മറ്റ് അപ്ഗ്രേഡുകൾക്കൊപ്പം പുതിയ അപ്‌ഹോൾസ്റ്ററി, വയർലെസ് ചാർജിംഗ് ഓപ്ഷൻ എന്നിവയും ലഭിച്ചേക്കാം.
പവർട്രെയിനിന്റെ കാര്യത്തിൽ, എർട്ടിഗ ഫേസ് ലിഫ്റ്റ് 105 എച്ച്പിയും 138 എൻഎം ടോർക്കും നൽകുന്ന 1.5 ലിറ്റർ ഫോർ സിലിണ്ടർ എഞ്ചിൻ നിലനിർത്തുമെന്ന് പ്രതീക്ഷിക്കുന്നു. എക്സ്എൽ6ന്റെ പവർട്രെയിനിലും കാര്യമായ മാറ്റങ്ങൾ ഉണ്ടായേക്കില്ലെന്നാണ് സൂചന.
അടുത്തിടെ പുറത്തിറങ്ങിയ കിയ കാരൻസുമായാണ് എർട്ടിഗയും, എക്സ്എൽ6ഉം പ്രധാനമായും മത്സരിക്കുന്നത്. ബുക്കിംഗ് ആരംഭിച്ച് ഏതാനും ദിവസങ്ങൾക്കുള്ളിൽ തന്നെ കാരൻസ് അരലക്ഷം ബുക്കിംഗ് കടന്നിരുന്നു. തങ്ങളുടെ എംപിവി ഉപഭോക്താക്കളെ നിലനിർത്താൻ പുതിയ ഫീച്ചറുകളും, അപ്‌ഡേഷനുകളും മാരുതി അവതരിപ്പിക്കുമെന്നാണ് ഏവരുടെയും പ്രതീക്ഷ.
Comments