ദിവസം തോറും കളക്ഷൻ വർധിക്കുന്നു, ഒമ്പതാം ദിനത്തിൽ ലഭിച്ചത് 24.80 കോടി രൂപ; 150 കോടിയിലേക്ക് കുതിച്ച് കശ്മീർ ഫയൽസ്

ന്യൂഡൽഹി: പ്രദർശനം തുടങ്ങി ദിവസങ്ങൾക്കുള്ളിൽ റെക്കോർഡ് കളക്ഷൻ സ്വന്തമാക്കി വിവേക് അഗ്‌നിഹോത്രിയുടെ ദ കശ്മീർ ഫയൽസ്. തീയേറ്ററിൽ പ്രദർശനം തുടരുന്ന കശ്മീർ ഫയൽസ് 150 കോടിയ്‌ക്ക് അരികെ എത്തിയിരിക്കുകയാണ്. ചിത്രം പുറത്തിറങ്ങി ഒൻപതാം ദിവസമായ ഇന്നലെ 24.80 കോടി രൂപയാണ് കളക്ഷനായി ലഭിച്ചത്. ഇതോടെ ചിത്രത്തിന്റെ ആകെ ബോക്സ്ഓഫീസ് കളക്ഷൻ 141.25 കോടി രൂപയായി.

മാർച്ച് 11നാണ് ചിത്രം റിലീസ് ചെയ്തത്. റിലീസ് ചെയ്ത് രണ്ടാം ആഴ്ച പിന്നിടുമ്പോഴേക്കും ചിത്രം 150 കോടിയ്‌ക്ക് മുകളിൽ കളക്ഷൻ നേടുമെന്നാണ് ട്രേഡ് അനലിസ്റ്റുകൾ പറയുന്നത്. തിങ്കളാഴ്ചയോടെ ചിത്രം 175 കോടി കളക്ഷൻ നേടുമെന്നാണ് പ്രവചനം. കശ്മീരി പണ്ഡിറ്റുകളുടെ ജീവിതവും യാതനകളും തുറന്ന് പറയുന്ന ചിത്രമാണ് ദി കശ്മീർ ഫയൽസ്.

യഥാർത്ഥ സംഭവങ്ങളെ അടിസ്ഥാനമാക്കിയുള്ള ദി കശ്മീർ ഫയൽസ് വിവേഗ് അഗ്‌നിഹോത്രിയാണ് സംവിധാനം ചെയ്തിരിക്കുന്നത്. രണ്ട് മണിക്കൂറും 50 മിനിറ്റുമാണ് ചിത്രത്തിന്റെ ദൈർഘ്യം. ചിത്രത്തിൽ മിഥുൻ ചക്രവർത്തി, അനുപം ഖേർ, ദർശൻ കുമാർ, പല്ലവി ജോഷി, ചിന്മയി മാണ്ട്‌ലേകർ, പുനീത് ഇസ്സർ, പ്രകാശ് ബേലവാടി, അതുൽ ശ്രീവാസ്തവ, മൃണാൽ കുൽക്കർണി എന്നിവരാണ് പ്രധാന വേഷങ്ങളിൽ അഭിനയിച്ചിരിക്കുന്നത്.