കോഴിക്കോട് : മലബാർ ക്രിസ്ത്യൻ കോളേജിന് പിന്നാലെ പ്രൊവിഡൻസ് കോളേജിൽ വിദ്യാർത്ഥിനികളുടെ അതിരുവിട്ട വാഹന അഭ്യാസ പ്രകടനം. സംഭവത്തിൽ വിദ്യാർത്ഥിനികൾക്കെതിരെ പോലീസ് കേസ് എടുത്തു. പെൺകുട്ടികൾ മാത്രം പഠിക്കുന്ന കോഴിക്കോട്ടെ സ്വകാര്യ കോളേജ് ആണ് പ്രൊവിഡൻസ്.
കാറുകളിലും ബൈക്കുകളിലുമായിരുന്നു അഭ്യാസ പ്രകടനം. വാഹനങ്ങളിൽ കോളേജിൽ എത്തിയ വിദ്യാർത്ഥിനികൾ മുറ്റത്ത് അഭ്യാസ പ്രകടനം നടത്തുകയായിരുന്നു. ഇരു ചക്രവാഹനങ്ങളിൽ രണ്ടിലധികം പേർ ഇരുന്നായിരുന്നു അപകടകരമാംവിധമുള്ള അഭ്യാസ പ്രകടനം. കാറുകളിലും നാലോളം പേർ ഉണ്ടായിരുന്നു. ഇതുമായി ബന്ധപ്പെട്ട ദൃശ്യങ്ങൾ പുറത്തുവന്നതോടെയാണ് മോട്ടോർവാഹന വകുപ്പ് കേസ് എടുത്തത്. അഭ്യാസ പ്രകകടം അവസാനിപ്പിക്കാൻ കോളേജ് അധികൃതർ ആവശ്യപ്പെട്ടിരുന്നെങ്കിലും അത് അനുസരിക്കാതെയായിരുന്നു വിദ്യാർത്ഥികളുടെ അഭ്യാസ പ്രകടനം. ഇത് വീഡിയോ ദൃശ്യങ്ങളിൽ നിന്നും വ്യക്തമാകുന്നുണ്ട്.
സംഭവത്തിൽ വിദ്യാർഥികളോടും, രക്ഷിതാക്കളോടും കോളജ് അധികൃതരോടും അടുത്ത ബുധനാഴ്ച ഹാജരാവാൻ കോഴിക്കോട് ആർടിഒ നിർദേശിച്ചിട്ടുണ്ട്.
നേരത്തെ മലബാർ ക്രിസ്ത്യൻ കോളേജിൽ നടന്ന അഭ്യാസ പ്രകടനത്തിനിടെ അമിത വേഗതയിൽ ആയിരുന്ന കാർ ഇരുചക്രവാഹനത്തെ ഇടിച്ച് തെറിപ്പിച്ചിരുന്നു. ഇതിൽ കേസെടുത്ത് മോട്ടോർവാഹന വകുപ്പ് നടപടികൾ സ്വീകരിച്ചുവരുന്നതിനിടെയാണ് വീണ്ടും സമാന സംഭവം.
Comments