സുരക്ഷാ കാരണങ്ങൾ ; ഗൂഗിൾ ക്രോം അടിയന്തിരമായി അപ്‌ഡേറ്റ് ചെയ്യാൻ നിർദ്ദേശം

വാഷിംഗ്ടൺ: ഗൂഗിൾ ക്രോം ഉപയോക്താക്കൾക്ക് വേണ്ടി ഒരു അടിയന്തിര സുരക്ഷാ അപ്‌ഡേറ്റ് പുറത്തു വിട്ടു.സീറോ ഡേ അപകട സാധ്യത ചൂഷണം ചെയ്യാൻ സാധ്യതയുണ്ടെന്ന വാർത്തകൾ പുറത്തു വന്നതിന് പിന്നാലെയാണ് പുതിയ നടപടി.

സുരക്ഷാ പ്രശ്‌നം പരിഹരിക്കാനാണ്. ഗൂഗിൾ ക്രോം പതിപ്പ് 99.0.4844.84-ലേക്കുള്ള അടിയന്തര അപ്ഡേറ്റ്. ഇത് അതീവ ഗൗരവമാണ് നിലവിലെ അക്രമണ സാധ്യത എന്ന് തെളിയിക്കുന്നതാണ്. കഴിഞ്ഞ ദിവസം പ്രസിദ്ധീകരിച്ച ക്രോമിന്റെ അപ്‌ഡേറ്റ് അറിയിപ്പിൽ സിവിഇ 2022-1096 എന്ന പ്രശ്‌നത്തിൽ നിന്നുള്ള ആക്രമണം ഏതു രീതിയിലും പ്രതീക്ഷിക്കാമെന്ന് ഗൂഗിൾ വ്യക്തമാക്കിയിരുന്നു.

അതിനാൽ എല്ലാ ക്രോം ഉപയോക്താക്കളും അവരുടെ ബ്രൗസറുകൾ അടിയന്തിരമായി പുതിയ അപ്ഡേറ്റ് ചെയ്തിട്ടുണ്ടെന്ന് ഉറപ്പാക്കാൻ ഗൂഗിൾ നിർദ്ദേശിക്കുന്നു.
ഏറ്റവും പുതിയ വിവര പ്രകാരം മൈക്രോസോഫ്റ്റ് ബ്രൗസറായ എഡ്ജിൽ ഈ അപകടസാധ്യത നിലനിൽക്കുന്നുണ്ടെന്ന് ഇപ്പോൾ സ്ഥിരീകരിച്ചിട്ടുണ്ട്.

ഇതിൽ നിന്നും സംരക്ഷണം നൽകാൻ എഡ്ജും അപ്ഡേറ്റ് നൽകിയിട്ടുണ്ട്. സെറ്റിംഗ്‌സ് – എബൗട്ട് എന്നതിലേക്ക് പോയാൽ ഈ അപ്‌ഡേറ്റ് ലഭിക്കും, എഡ്ജ് 99.0.1150.55 അല്ലെങ്കിൽ അതിൽ ഉയർന്ന പതിപ്പിൽ സിവിഇ-20221096 പ്രശ്നം ബാധിക്കാമെന്നാണ് മൈക്രോസോഫ്റ്റ് പറയുന്നത്.