ഒടുവിൽ സത്യം പുറത്തുവന്നു- കർഷകർ കാർഷിക ബില്ലിനൊപ്പമായിരുന്നു; വീഡിയോ കാണാം

കാർഷിക ബിൽ വിരുദ്ധ പ്രക്ഷോഭകരേ… കപടകർഷക സ്‌നേഹികളേ…. നിങ്ങളിത് കാണണം… നിങ്ങളിത് കേൾക്കണം…..
രാജ്യത്ത് ഏറെ വിവാദങ്ങൾക്കും ശബ്ദ കോലാഹലങ്ങൾക്കും പ്രക്ഷോഭങ്ങൾക്കും കാരണമായ കാർഷിക ബില്ലിനെകുറിച്ചുള്ള പുതിയ റിപ്പോർട്ട് ചർച്ചയാവുകയാണ്…… ബില്ലിനെ എതിർത്തവരുടെ കപടമുഖം തുറന്നുകാണിക്കുന്ന റിപ്പോർട്ടാണ് സുപ്രീംകോടതി നിയോഗിച്ച വിദഗ്ദ സമിതി തയ്യാറാക്കിയിരിക്കുന്നത്….. കേന്ദ്രസർക്കാർ കൊണ്ടുവന്ന ബില്ലിനെ രാജ്യത്തെ കർഷകരിൽ ഭൂരിഭാഗവും പിന്തുണയ്‌ക്കുന്നു എന്നതടക്കമുള്ള യാഥാർത്ഥ്യങ്ങൾ അടങ്ങുന്നതാണ് സമിതിയുടെ റിപ്പോർട്ട്….. കർഷകരുടെ അന്തകരായി പിടിമുറുക്കിയിരുന്ന ഇടനിലക്കാരും പ്രതിപക്ഷ രാഷ്‌ട്രീയ കക്ഷികളും നടത്തിയ ഒത്തുകളിയുടെ യഥാർത്ഥചിത്രമാണ് സമിതി റിപ്പോർട്ടിലൂടെ പുറത്തുവന്നത്. ഇടനിലക്കാരുടേയും പ്രതിപക്ഷത്തിന്റെ ആസൂത്രിതമായ പ്രക്ഷോഭങ്ങളുടേയും പ്രതിഷേധങ്ങളുടേയും പശ്ചാത്തലത്തിൽ കഴിഞ്ഞ നവംബറിൽ കേന്ദ്രസർക്കാർ നിയമം പിൻവലിച്ചിരുന്നു.

വിവിധ സംസ്ഥാനങ്ങളിലെ മൂന്ന് കോടിയിലേറെ കർഷകർ, കാർഷിക പരിഷ്‌കരണ ബില്ലിനെ പിന്തുണയ്‌ക്കുന്നതായി റിപ്പോർട്ടിൽ പറയുന്നു. എന്നാൽ കേന്ദ്രസർക്കാർ പിൻവലിച്ച നിയമങ്ങൾ പുനഃസ്ഥാപിക്കണമെന്നും സംസ്ഥാനങ്ങൾ കാർഷിക പരിഷ്‌കാര നിയമങ്ങൾ നടപ്പാക്കണമെന്നും സമിതി നിർദ്ദേശിക്കുന്നു. കാർഷിക മേഖലയിലെ തർക്ക പരിഹാരത്തിനായി സിവിൽ കോടതിയോ ആർബിട്രേഷൻ സംവിധാനങ്ങളോ കർഷകർക്ക് അടിയന്തിരമായി ഏർപ്പെടുത്തണം. കാർഷിക പരിഷ്‌കരണ നിയമങ്ങളെ പിന്തുണച്ച നിരവധി കർഷകരോട് അനീതി കാട്ടിയെന്നും റിപ്പോർട്ടിൽ പറയുന്നുണ്ട്.

ഈ റിപ്പോർട്ട് തയ്യാറാക്കാൻ 266 സംഘടനകളുമായി സുപ്രീം കോടതി നിയോഗിച്ച വിദഗ്ധ സമിതി ബന്ധപ്പെട്ടിരുന്നു. സമിതിയ്‌ക്ക് മുൻപിൽ കാര്യങ്ങൾ അവതരിപ്പിച്ച 73 കാർഷിക സംഘടനകളിൽ 61 എണ്ണവും കാർഷിക നിയമങ്ങളെ പിന്തുണച്ചു. 86.7 ശതമാനത്തോളം വരുമിത്. നാല് സംഘടനകൾ മാത്രമാണ് എതിർത്തത്. ഏഴ് സംഘടനകൾ ഭേദഗതി ആവശ്യപ്പെട്ടു. അവശ്യസാധന നിയമ ഭേദഗതി, കർഷക ഉത്പന്ന വ്യാപാര വാണിജ്യ നിയമം, കർഷക (ശാക്തീകരണ, സംരക്ഷണ) നിയമം എന്നീ പരിഷ്‌കാരങ്ങളാണ് കേന്ദ്രസർക്കാർ കൊണ്ടുവന്നത്.

കാർഷിക മേഖലയിലെ അടിസ്ഥാന സൗകര്യങ്ങൾ സഹകരണ സ്ഥാപനങ്ങൾ വഴിയോ ഫാർമർ പ്രൊഡ്യൂസർ ഓർഗനൈസേഷൻ വഴിയോ വേഗത്തിലാക്കണം. അഗ്രികൾച്ചർ മാർക്കറ്റിംഗ് കൗൺസിൽ എല്ലാ സംസ്ഥാനങ്ങളിലും നിയമം മൂലം നടപ്പിലാക്കണമെന്ന നിർദ്ദേശവും സമിതി മുന്നോട്ട് വെച്ചിട്ടുണ്ട്. 92 പേജുള്ള റിപ്പോർട്ടാണ് മൂന്നംഗ സമിതി കഴിഞ്ഞ ദിവസം സുപ്രീം കോടതിയിൽ സമർപ്പിച്ചത്.

കാർഷിക സാമ്പത്തിക വിദഗ്ധൻ അശോക് ഗുലാത്തി, ഷേത്കാരി സംഘടന പ്രസിഡന്റ് അനിൽ ഗൺവത് ഇന്റർനാഷണൽ ഭഷ്യനയ ഗവേഷണ ഇൻസ്റ്റിറ്റ്യൂട്ട് ഉദ്യോഗസ്ഥൻ പ്രമോദ് കുമാർ ജോഷി, ഭാരതീയ കിസാൻ യൂണിയൻ പ്രസിഡന്റ് ഭൂപേന്ദർ സിംഗ് എന്നിവരായിരുന്നു സമിതി അംഗങ്ങൾ. ഭൂപേന്ദർ സിംഗ് സമിതിയിൽ നിന്നും സ്വയം ഒഴിവായിരുന്നു.

13.3 ശതമാനം കർഷകർ മാത്രമാണ് മൂന്ന് കാർഷിക നിയമങ്ങളെയും അനുകൂലിക്കുന്നില്ലെന്ന് പറയുന്നത്. 3.3 കോടി കർഷകരെ പ്രതിനിധീകരിക്കുന്ന കർഷക സംഘടനകളിൽ 85.7 ശതമാനവും നിയമത്തെ പിന്തുണച്ചുവെന്ന് റിപ്പോർട്ടിൽ വ്യക്തമാകുന്നു. ഡൽഹിയിൽ വാർത്താ സമ്മേളനത്തിൽ സമിതിയിലെ മൂന്നംഗങ്ങളിൽ ഒരാളായ അനിൽ ഘൻവതാണ് റിപ്പോർട്ട് പുറത്തുവിട്ടത്.

കർഷകരുടെ നന്മ ലക്ഷ്യമിട്ടുകൊണ്ട് കേന്ദ്ര സർക്കാർ പുറപ്പെടുവിച്ച ബില്ല് കഴിഞ്ഞ നവംബറിലാണ് പിൻവലിച്ചത്. പ്രതിപക്ഷ പാർട്ടികളുടെയും ഇടനിലക്കാരുടെ സംഘടനകളുടെ കുപ്രചാരണമാണ് കർഷകരെ തെറ്റിദ്ധരിപ്പിച്ചത് എന്ന് ഇതിലൂടെ വ്യക്തമാണ്.