തിരുവനന്തപുരം:വളർത്ത് നായയെ ഓട്ടോയിൽ കയറ്റുന്നതിനെച്ചൊല്ലിയുള്ള തർക്കത്തിനിടെ യുവാവിന് ക്രൂരമർദ്ദനമേറ്റു.തിരുവനന്തപുരം മടവൂർ സ്വദേശി രാഹുലിനാണ് കമ്പി വടി കൊണ്ട് തലയ്ക്ക് അടിയേറ്റത്.ഗുരുതരാവസ്ഥയിലായ രാഹുൽ ആശുപത്രിയിൽ ചികിത്സയിലാണ്.സംഭവത്തിൽ മൂന്ന് പേരെ പള്ളിക്കൽ പോലീസ് അറസ്റ്റ് ചെയ്തു. മടവൂർ സ്വദേശികളായ അഭിജിത്ത്,ദേവജിത്ത്,രതീഷ് എന്നിവരാണ് പിടിയിലായത്. ലഹരി സംഘത്തിൽപ്പെട്ടവരാണ് പ്രതികളെന്ന് പോലീസ് വ്യക്തമാക്കി.
മർദ്ദനമേറ്റ രാഹുലും പ്രതികളായ അഭിജിത്തും ദേവജിത്തും സുഹൃത്തുക്കളായിരുന്നുവെന്ന് പോലീസ് പറയുന്നു.രാഹുലിന് വളർത്ത് നായകളെ വിൽക്കുന്ന ബിസിനസാണ്. കഴിഞ്ഞയാഴ്ച വളർത്ത് നായയെ മൃഗാശുപത്രിയിൽ കൊണ്ട് പേകാൻ രാഹുൽ ഓട്ടോ ഡ്രൈവറായ അഭിജിത്തിനെ വിളിച്ചു. എന്നാൽ നായയെ ഓട്ടോയിൽ കയറ്റാനാകില്ലെന്ന് അഭിജിത്ത് പറഞ്ഞതോടെ ഇരുവരും തമ്മിൽ വാക്ക് തർക്കമുണ്ടായി.
പിന്നീട് പലതവണയും ഇരുവരും തമ്മിൽ തർക്കമുണ്ടായി. ഇന്നലെ സീമന്തപുരം മഹാദേവ ക്ഷേത്ര ഉത്സവത്തിന് പോകാൻ തുമ്പോട് ജംഗ്ഷനിൽ നിന്ന രാഹുലിനെ അഭിജിത്ത്, സഹോദരൻ ദേവജിത്ത് അയൽവാസി രതീഷ് എന്നിവർ ചേർന്ന് ആക്രമിക്കുകയായിരുന്നു.
ദേവജിത്ത് ഷർട്ടിൽ ഒളിപ്പിച്ച് വച്ചിരുന്ന കമ്പി വടി കൊണ്ട് രാഹുലിനെ തലയ്ക്കടിച്ച് പ്രതികൾ ഓടി രക്ഷപ്പെടുകയായിരുന്നു. ഗുരുതരമായി പരിക്കേറ്റ രാഹുലിനെ പാരിപ്പള്ളി മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു. തലയിൽ 16 തുന്നിക്കെട്ടുകളുള്ള രാഹുൽ തീവ്രപരിചരണ വിഭാഗത്തിലാണ്.
കഞ്ചാവ് വിൽപ്പന നടത്തുന്നവരാണ് പ്രതികളെന്നും ഇവർക്കെതിരെ കൊലപാതക ശ്രമത്തിന് കേസെടുത്തിട്ടുണ്ടെന്നും പള്ളിക്കൽ സി ഐ ശ്രീജിത്ത് പറഞ്ഞു. ഒളിവിലായിരുന്ന പ്രതികളെ ഇന്ന് രാവിലെയാണ് പിടികൂടിയത്.
