അമരാവതി : ആന്ധ്രയിലെ ഒരു ഗ്രാമത്തിൽ ഇപ്പോൾ ലോക്ഡൗൺ പ്രഖ്യാപിച്ചിരിക്കുകയാണ്. കൊറോണയെ ഭയന്ന് സർക്കാർ ഏർപ്പെടുത്തിയ ലോക്ഡൗൺ അല്ല. പകരം ജനങ്ങൾ തന്നെ സ്വമേധയാ ഏർപ്പെടുത്തിയ ലോക്ഡൗൺ. മാംസം കഴിക്കുന്ന പിശാചുക്കളെ ഓടിക്കാനാണ് ഇവർ ഈ വിചിത്രമായ ലോക്ഡൗൺ ഏർപ്പെടുത്തിയിരിക്കുന്നത്.
ഒഡീഷയുമായി അതിർത്തി പങ്കിടുന്ന ശ്രീകാകുളം ജില്ലയിലെ സരുബുജ്ജിലിയിൽ സ്ഥിതി ചെയ്യുന്ന വെണ്ണെലവലസ ഗ്രാമത്തിലാണ് സംഭവം. ഒരു മാസത്തിനുള്ളിൽ നാല് ഗ്രാമവാസികൾ ഇവിടെ ദുരൂഹ സാഹചര്യത്തിൽ മരിച്ചിരുന്നു. ഇതാണ് ഗ്രാമവാസികൾ ലോക്ഡൗൺ തിരഞ്ഞെടുക്കാൻ കാരണം.
ലോക്ക്ഡൗൺ ദുരാത്മാക്കൾക്കെതിരെ പ്രവർത്തിക്കുമെന്നാണ് ഇവിടുത്തെ ഗ്രാമവാസികൾ വിശ്വസിക്കുന്നത്. ഗ്രാമത്തിലെ സർക്കാർ ഓഫീസുകളും സ്കൂളുകളും അങ്കണവാടികളും അടഞ്ഞ് കിടക്കുകയാണ്. ഗ്രാമത്തിലേക്ക് പുറത്തുനിന്നുള്ളവർ പ്രവേശിക്കുന്നത് തടയാൻ ഇവിടെ വേലി കെട്ടി സംരക്ഷിക്കുന്നുണ്ട്.
കഴിഞ്ഞ കുറച്ച് ദിവസങ്ങളായി ഗ്രാമത്തിലെ ചിലർക്ക് പനി പിടിപെടുകയും നാല് പേർ മരിക്കുകയും ചെയ്തതായി നാട്ടുകാർ പറയുന്നു. ഗ്രാമത്തിൽ അലഞ്ഞുതിരിയുന്ന ദുഷ്ടാത്മാക്കൾ മൂലമാണ് ഇത് സംഭവിച്ചതെന്നാണ് ഇവിടുത്തുകാർ വിശ്വസിക്കുന്നത്. വൈദികരുടെ നിർദ്ദേശപ്രകാരമാണ് ഏപ്രിൽ 17 മുതൽ 25 വരെ ലോക്ക്ഡൗൺ ഏർപ്പെടുത്തിയിരിക്കുന്നത്. ഇതിനായി ഗ്രാമത്തിലേക്കുള്ള വഴി അടച്ചു.
എന്നാൽ എല്ലാം നിശ്ചലമായതോടെ അങ്കണവാടിയും സ്കൂളും വില്ലേജ് സെക്രട്ടേറിയറ്റും തുറക്കാൻ അനുവദിക്കണമെന്ന് ആവശ്യപ്പെട്ട് പോലീസുകാർ ഉൾപ്പെടെ അധികാരികളെ സമീപിച്ചു. ഇതിന് പിന്നാലെയാണ് ഇവ പ്രവർത്തിക്കാൻ അനുവദിച്ചത്. എന്നാലും ഈ ഗ്രാമത്തിൽ താമസിക്കുന്ന കൂടുതൽ പേരും ഇപ്പോൾ വീടുകൾക്ക് പുറത്തിറങ്ങാറില്ല.
