ഇടുക്കി : തൃക്കാക്കര ഉപതിരഞ്ഞെടുപ്പിൽ കോൺഗ്രസ് സ്ഥാനാർത്ഥിയായി മത്സരിക്കുന്ന മുൻ എംഎൽഎ പിടി തോമസിന്റെ ഭാര്യ ഉമ തോമസ് ഇടുക്കി ബിഷപ്പ് മാർ ജോൺ നെല്ലിക്കുന്നേലിനെ സന്ദർശിക്കാൻ എത്തി. ഇന്ന് രാവിലെയോടെയാണ് ഉമ തോമസ് ഇടുക്കിയിൽ എത്തിയത്.
പിടി തോമസിന്റെ ജന്മനാടായ ഇടുക്കിയിലെ ഉപ്പുതോട്ടത്തിൽ എത്തിയ ഉമ തോമസ, പിടിയുടെ ചിതാഭസ്മം നിക്ഷേപിച്ചിരിക്കുന്ന കുടുംബ കല്ലറയിൽ എത്തി പ്രാർത്ഥിച്ചു. ഇതിന് ശേഷമാണ് ബിഷപ്പിനെ സന്ദർശിക്കാനെത്തിയത്. പി.ടി യുടെ അടുത്ത് നിന്നും തിരഞ്ഞെടുപ്പ് പ്രചാരണം ആരംഭിക്കണമെന്നായിരുന്നു തന്റെ ആഗ്രഹം എന്ന് ഉമ പറഞ്ഞു.
പിതാവിന്റെ അനുഗ്രഹം വാങ്ങാനാണ് താൻ എത്തിയത് എന്നും അനുഗ്രഹം ലഭിച്ചെന്നും ബിഷപ്പിനെ കണ്ട ശേഷം അവർ മാദ്ധ്യമങ്ങളോട് പറഞ്ഞു. ശേഷം തൃക്കാക്കരയിലെ വീട്ടിലേക്ക് മടങ്ങി പ്രചാരണ പരിപാടികൾ ആരംഭിക്കാനാണ് തീരുമാനം. എംഎൽഎയായിരിക്കെ പിടി തോമസ് അന്തരിച്ച സാഹചര്യത്തിലാണ് മണ്ഡലത്തിൽ ഉപതിരഞ്ഞെടുപ്പ് നടക്കുന്നത്. ഇതിനായി പിടി തോമസിന്റെ ഭാര്യയെ തന്നെയാണ് കോൺഗ്രസ് സ്ഥാനാർത്ഥിയായി തിരഞ്ഞെടുത്തത്.
മുതിർന്ന കോൺഗ്രസ് നേതാവ് കെ.വി തോമസിനെ കാണുമെന്നും അദ്ദേഹത്തിന് തന്നെ തള്ളി പറയാൻ സാധിക്കില്ലെന്നും ഉമ തോമസ് പറഞ്ഞു. അദ്ദേഹവും കുടുംബവുമായി ആത്മബന്ധം ഉണ്ട്. അദ്ദേഹത്തിന്റെ ഭാര്യയുമായി സംസാരിച്ചിരുന്നുവെന്നും കുടുംബത്തിന്റെ പൂർണ്ണ പിന്തുണ ഉണ്ടെന്ന് അവർ പറഞ്ഞതായും ഉമ തോമസ് പ്രതികരിച്ചു.
Comments