നിർമാണത്തിലിരുന്ന പാലത്തിന്റെ ബീമുകൾ തകർന്ന് വീണു; അപകടം ഹൈഡ്രോളിക് ജാക്കിയുടെ തകരാർ മൂലം

കോഴിക്കോട്: നിർമാണത്തിലിരുന്ന പാലത്തിന്റെ ബീമുകൾ തകർന്നു. മലപ്പുറം കൂളിമാട് കടവിലാണ് സംഭവം. തൊഴിലാളികൾക്ക് പരിക്കുകളില്ലെന്നാണ് വിവരം.

ഇന്നലെ രാത്രി പെയ്ത മഴയുടെ തുടർച്ചയാകാം പാലം തകരാൻ കാരണമായതെന്നായിരുന്നു പ്രാഥമിക നിഗമനം. എന്നാൽ ഹൈഡ്രോളിക് ജാക്കിയുടെ തകരാറുമൂലമാണ് അപകടമുണ്ടായതെന്ന് പൊതുമരാമത്ത് വകുപ്പ് നിർദേശം നൽകി. ഒരു മാസത്തിനകം പുനർനിർമിക്കുമെന്നും സർക്കാർ അറിയിച്ചു.

തിങ്കളാഴ്ച രാവിലെ 9 മണിയോടെയാണ് കോൺക്രീറ്റ് ബീമുകൾ തകർന്നുവീണത്. കഴിഞ്ഞ രണ്ട് വർഷമായി ചാലിയാർ പുഴയുടെ കുറുകെ പാലം പണി തുടരുകയാണ്. നിർമാണം പൂർത്തിയാകുന്ന ഘട്ടത്തിലാണ് ബീമുകൾ തകർന്നുവീണത്. 2019 മാർച്ചിലായിരുന്നു കോഴിക്കോട് – മലപ്പുറം ജില്ലകളെ ബന്ധിപ്പിച്ച് ചാലിയാർ പുഴയ്‌ക്ക് കുറുകെ പാലം പണി ആരംഭിച്ചത്.