ഡോഗ് ഫുഡ് രുചിച്ച് നോക്കാൻ തയ്യാറാണോ? അഞ്ച് ലക്ഷം രൂപ പ്രതിഫലം നൽകുമെന്ന് കമ്പനി

ലണ്ടൻ: അഞ്ച് ദിവസം ഡോഗ് ഫുഡ് കഴിച്ചാൽ അഞ്ച് ലക്ഷം രൂപ സമ്മാനം. അവിശ്വസനീയമെന്ന് തോന്നുന്ന ഈ ഓഫർ വ്യാജമാണെന്ന് കരുതേണ്ട. യുകെ ആസ്ഥാനമായി പ്രവർത്തിക്കുന്ന കമ്പനിയാണ് ഡോഗ് ഫുഡ് കഴിച്ചാൽ അഞ്ച് ലക്ഷം രൂപ വാഗ്ദാനം നൽകുന്നത്.

കമ്പനി ഉൽപാദിപ്പിക്കുന്ന ഡോഗ് ഫുഡ് കഴിച്ചു നോക്കുകയാണ് ചുമതല. അഞ്ച് ദിവസം തുടർച്ചയായി കഴിക്കണം. ഡോഗ് ഫുഡ് രുചിച്ചുനോക്കുന്ന ഉദ്യമത്തിൽ ഏർപ്പെട്ടാൽ അദ്ദേഹത്തിന് അനുഭവപ്പെടുന്ന കാര്യങ്ങൾ പങ്കുവെക്കണം. ആഹാരത്തിന്റെ രുചി, കഴിക്കുമ്പോൾ എന്ത് തോന്നുന്നു, എനർജി ലെവൽ എത്രമാത്രമുണ്ട്, മാനസിക നില എപ്രകാരമാകുന്നു തുടങ്ങിയ കാര്യങ്ങൾ രേഖപ്പെടുത്തണം.

യുകെയുടെ ഒ.എം.എൻ.ഐ (ഒമ്‌നി) എന്ന കമ്പനിയാണ് ഇത് സംബന്ധിച്ച അറിയിപ്പ് പുറത്തിറക്കിയത്. ജോലിയിലേക്ക് നിലവിൽ ഒരാളുടെ ഒഴിവ് മാത്രമാണുള്ളതെന്നും കമ്പനി പ്രത്യേകം പരാമർശിക്കുന്നു. തസ്തികയിലേക്ക് അപേക്ഷിക്കുന്നവർക്ക് പ്രത്യേകിച്ച് യോഗ്യതകൾ ഒന്നും ആവശ്യമില്ലെന്ന് കമ്പനി വ്യക്തമാക്കിയിട്ടുണ്ട്. അതേസമയം അലർജിയുള്ളവർ അപേക്ഷിക്കരുതെന്നാണ് കർശന നിർദേശം. യുകെയിൽ താമസിക്കുന്ന 18 വയസിന് മുകളിലുള്ളവർക്ക് തസ്തികയിലേക്ക് അപേക്ഷിക്കാം.

ഒമ്‌നി എന്ന കമ്പനി പ്രധാനമായും സസ്യാഹാരങ്ങൾ ഉപയോഗിച്ച് ഡോഗ് ഫുഡ് ഉൽപാദിപ്പിക്കുന്നവരാണ്. മധുരക്കിഴങ്ങ്, പയർ, അരി, മത്തങ്ങ, ബ്ലൂബെറി, കടല, ക്രാൻബെറി എന്നിവയാണ് ഡോഗ് ഫുഡിലെ പ്രധാന ഘടകങ്ങൾ. അതുകൊണ്ട് തന്നെ മനുഷ്യർക്ക് ഭക്ഷിക്കാൻ സാധിക്കുന്ന വിധത്തിലാണ് ഒമ്‌നി കമ്പനി ഡോഗ് ഫുഡ് ഉണ്ടാക്കുന്നതെന്ന് സഹസ്ഥാപകൻ ശിവ് ശിവകുമാർ പറയുന്നു. മനുഷ്യന് വേണ്ടാത്ത ആഹാര പദാർത്ഥങ്ങളോ ബാക്കിവന്ന ഭക്ഷണമോ ചേർത്തിട്ടല്ല തങ്ങൾ ഡോഗ് ഫുഡ് ഉൽപാദിപ്പിക്കുന്നതെന്നും അതുകൊണ്ട് തന്നെയാണ് ഇത് രുചിച്ച് നോക്കാൻ മനുഷ്യരെ തന്നെ നിയോഗിക്കുന്നതെന്നും അദ്ദേഹം കൂട്ടിച്ചേർത്തു.