ബിടിഎസ് പിരിയുന്നില്ല; പോസ്റ്റ് തർജ്ജമ ചെയ്തതിലെ അബദ്ധമെന്ന് ജുങ്കുക്ക്

സോൾ: ബിടിഎസ് ആർമിയ്‌ക്ക് ആശ്വാസവാർത്തയുമായി ബാൻഡ്. ബിടിഎസ് പിരിച്ചു വിടുവെന്നുള്ള വാർത്തകൾ തള്ളി സംഘാംഗമായ ജുങ്കുക്ക് രംഗത്തെത്തി. കൊറിയൻ ഭാഷയിൽ നൽകിയ വിശദീകരണം ഇംഗ്ലീഷിലേക്ക് വിവർത്തനം ചെയ്തപ്പോൾ സംഭവിച്ച ആശയക്കുഴപ്പമാണെന്ന് ജുങ്കുക്ക് വ്യക്തമാക്കി.

തങ്ങൾ വ്യക്തിഗത പരിപാടികളിലേക്ക് കൂടുതൽ ശ്രദ്ധ കേന്ദ്രീകരിക്കുകയാണെന്നും ഒന്നിച്ചു പരിപാടികൾ ഇടവേളയ്‌ക്ക് ശേഷം ചെയ്യുമെന്നും ഗായകൻ പറഞ്ഞു.തങ്ങൾ തൽക്കാലം വേർപിരിയാൻ ഉദ്ദേശിക്കുന്നില്ലെന്നും ജുങ്കുക്ക് വിശദീകരിച്ചു. വീഡിയോ സന്ദേശത്തിലൂടെയാണ് ജുങ്കുക്ക്, ബിടിഎസ് പിരിയുന്നുവെന്ന പ്രചരണങ്ങൾ തള്ളിയത്.

ജിൻ, ഷുഗ, ആർ.എം., ജെ-ഹോപ്, ജിമിൻ, വി, ജങ്കുക്ക് എന്നിവരാണ് ബി.ടി.എസിലെ അംഗങ്ങൾ. ഇവർ ഒന്നിച്ചുള്ള ആദ്യ ആൽബത്തിന്റെ ഒൻപതാം വാർഷികം ആഘോഷിക്കാൻ ഒരു അത്താഴ വിരുന്ന് സംഘടിപ്പിച്ചിരുന്നു.ഇതിലാണ് വ്യക്തിഗത പരിപാടികളെക്കുറിച്ചുള്ള തീരുമാനം അറിയിച്ചത്. അതിന് തൊട്ടുപിന്നാലെയാണ് വേർപിരിയുന്നുെവെന്ന പ്രചാരണം ശക്തമായത്.

തങ്ങളുടെ ശബ്ദവും ദിശാബോധവും വീണ്ടെടുക്കാൻ ഒരു ഇടവേള ആവശ്യമാണെന്നാണ് ബാൻഡിന്റെ തീരുമാനം. എന്നാൽ വ്യക്തിഗത പ്രൊജക്ടുകളിൽ ഓരോരുത്തരും പ്രവർത്തിക്കും. ഒരു ബാൻഡ് എന്ന നിലയിൽ ബിടിഎസ് ഒരു ഇടവേളയിലായിരിക്കുമ്പോഴും, എല്ലാ അംഗങ്ങളും ഈ സമയത്ത് അവരുടെ വ്യക്തിഗത സംഗീതം പുറത്തിറക്കുമെന്നുമാണ് ബാൻഡ് അറിയിച്ചത്.