ഇവിടെ കുടവയറാണ് ഫാഷൻ; ഏറ്റവും വലിയ കുടവയർ ആർക്കെന്ന് കണ്ടെത്താൻ മത്സരവും;വീഡിയോ കാണാം

കൊറോണ വന്നതോടെ കുടവയർ ഒരു വലിയ സാമൂഹിക പ്രശ്‌നമായി മാറിയിരിക്കുകയാണ്. മാസങ്ങളോളം വീടിനകത്ത് അടച്ചിരുന്ന പലരും പുറത്തിറങ്ങിയപ്പോൾ രൂപത്തിലും ഭാവത്തിലും വ്യത്യാസം വന്നു. ഐടി മേഖലകളിലെയും മറ്റും ഇരുന്നുള്ള ജോലിയാണ് ഇതിന്റെ പ്രധാന കാരണം. ഇരുന്നാൽ എഴുന്നേൽക്കാനോ, എഴുന്നേറ്റാൽ ഇരിക്കാനോ സാധിക്കാത്ത തരത്തിൽ കുടവയർ ജവങ്ങളെയാകെ ബുദ്ധിമുട്ടിലാക്കിയിരിക്കുകയാണ്. ലോക്ഡൗണൊക്കെ മാറി എല്ലാം പഴയതുപോലെയായതോടെ ശരീരത്തിന്റെ ആരോഗ്യത്തിനായി ഈ വയറൊന്ന് കുറയ്‌ക്കണമെന്നും പലരും വിചാരിക്കുന്നുണ്ട്. അതുകൊണ്ട് തന്നെ ജിമ്മുകൾക്ക് പുറമേ ഇപ്പോൾ സൂംബ ക്ലാസുകളിലും തിരക്കേറെയാണ്.

എന്നാൽ കുടവയറുകൾ ഇന്നും ഒരഭിമാനമായി കൊണ്ടുനടക്കുന്ന കുറെയേറെ ആളുകളുണ്ട്. എത്യോപ്യയിലെ ബോദി ഗോത്രവർഗക്കാരാണ് കുടവയർ ആചാരത്തിന്റെ ഭാഗമായി കൊണ്ടുനടക്കുന്നത്. തെക്കൻ എത്യോപ്യയിലെ ജിൻകാ ടൗണിന് അടുത്തുള്ള ഒമോ താഴ്വരയിൽ ജീവിക്കുന്ന ഗോത്രമാണ് ബോദി അഥവാ മീൺ. ഇവരുടെ ആചാരങ്ങൾ മറ്റുള്ള വിഭാഗങ്ങളിൽ നിന്ന് വളരെയധികം വ്യത്യസ്ഥമാണ്.

കുടവയർ ഉള്ളവരെ ജീവിത പങ്കാളികളായി കിട്ടാൻ ഭൂരിഭാഗം സ്ത്രീകളും ആഗ്രഹിക്കാറില്ലെങ്കിലും ഇവിടെ നേരെ വിപരീതമാണ്. തടിച്ച ശരീരവും വീതി കൂടിയ അരക്കെട്ടുമുള്ള ആണുങ്ങളെയാണ് ഇവിടെ പെൺകുട്ടികൾക്ക് ഇഷ്ടം. വലിയ ശരീര ഭാരം ഗോത്രവർഗത്തിലെ സ്ത്രീകൾ ആകർഷകമായ കണക്കാക്കുന്നു.

കുടവയർ ഒരു മത്സരയിനമായും ഇവർ തിരഞ്ഞെടുത്തിട്ടുണ്ട്. പുതുവർഷത്തിൽ നടത്തുന്ന കായേൽ എന്ന ആചാരത്തിന്റെ ഭാഗമായുള്ള മത്സത്തിനായി യുവാക്കൾ തടി വർദ്ധിപ്പിക്കുക പതിവാണ്. വർഷം തോറും നടക്കുന്ന മത്സരത്തിൽ എല്ലാ കുടുംബത്തിൽ നിന്നും അവിവാഹിതനായ ഒരു യുവാവിനെ പങ്കെടുപ്പിക്കാം. മത്സരത്തിൽ പങ്കെടുക്കുന്ന കാലയളവിൽ യുവാക്കളെ പ്രത്യേകം മൺകുടിലുകളിലാണ് താമസിപ്പിക്കുന്നത്. ഇവർക്ക് പോഷകാഹാങ്ങളും നൽകും. ഭക്ഷണം കഴിച്ച ശേഷം കുടിലിൽ വെറുതെ ഇരിക്കണം.

ആറുമാസം കഴിഞ്ഞ് ഇവർ പുറത്തുവരുന്ന ദിവസം വലിയ ആഘോഷമാണ്. മണ്ണും ചാരവുംകൊണ്ട് ശരീരമാകെ മറച്ചാണ് ഇവർ പുറത്തു വരിക. മാസങ്ങളോളം കുടിലിനകത്ത് കിടക്കുന്നതിനാൽ പലർക്കും നടക്കാൻ പോലും സാധിക്കാറില്ല. ഇവരെ പ്രത്യേകം വാഹനത്തിലാണ് മത്സരം നടക്കുന്ന സ്ഥലത്തെത്തിക്കുക. മത്സരത്തിലെ വിജയികൾക്ക്് പ്രത്യേകം സമ്മാനങ്ങളൊന്നും ഇല്ലെങ്കിലും സമൂഹത്തിൽ ഉയർന്ന ബഹുമാനവും ആദരവും ലഭിക്കും.

പാരമ്പര്യങ്ങൾ തനിമയോടെ നില നിർത്താൻ ആഗ്രഹിയ്‌ക്കുന്നവരാണ് ബോധി ഗോത്രക്കാർ. അതുകൊണ്ട് തന്നെ തങ്ങളുടെ നിലം വിട്ട് പോകാൻ ഇവർ തയ്യാറല്ല. ഏറ്റവും നല്ല കുടവയറുള്ള ആളാകുക എന്നതാണ് ബോദി ഗോത്രത്തിലെ ഓരോ കുട്ടിയുടെയും ആഗ്രഹം. ഏറ്റവും വലിയ കുടവയറുള്ള യുവാക്കളെ വിവാഹം കഴിക്കാനും ഇവിടെ യുവതികൾ ഏറെയാണ്.