ചെന്നൈ: ശ്രീലങ്കൻ നാവികസേന 12 ഇന്ത്യൻ മത്സ്യത്തൊഴിലാളികളെ അറസ്റ്റ് ചെയ്ത സംഭവത്തിൽ കേന്ദ്രം ഇടപെടണമെന്ന് ആവശ്യവുമായി തമിഴ്‌നാട് ബിജെപി അധ്യക്ഷൻ അണ്ണാമലൈ. വിദേശകാര്യ മന്ത്രി എസ് ജയശങ്കർ അടിയന്തരമായി ഇടപെടണമെന്നും തൊഴിലാളികളെ തിരികെ എത്തിക്കണമെന്നും അപേക്ഷിച്ചാണ് കത്തയച്ചത്.
കഴിഞ്ഞ എട്ടുവർഷങ്ങളിലായി പ്രധാനമന്ത്രിയുടെ നേതൃത്വത്തിൽ 2,977 മത്സ്യത്തൊഴിലാളികളെ സുരക്ഷിതരായി തിരിച്ചെത്തിച്ച വിദേശകാര്യ മന്ത്രാലയത്തിന് അദ്ദേഹം നന്ദി അറിയിച്ചു. മുഖ്യമന്ത്രി എംകെ സ്റ്റാലിനും കേന്ദ്രത്തിന്റെ ഇടപെടലുകൾ ഉണ്ടാവണമെന്ന് അഭ്യർത്ഥിച്ച് വിദേശകാര്യമന്ത്രാലയത്തിന് കത്ത് അയക്കുകയും ചെയ്തു.
ജൂലൈ 4നാണ് 12 ഇന്ത്യൻ മത്സ്യത്തൊഴിലാളികൾ ശ്രീലങ്കയിലെ പോയിന്റ് പെഡ്രോയിലാണ് അറസ്റ്റിലായത്. അനധികൃതമായി മത്സ്യബന്ധനത്തിലേർപ്പെട്ടതിനാണ് ഇവർ അറസ്റ്റിലായത്.അറസ്റ്റിലായവരെ നേവി ഫിഷറീസ് ഡയറക്ട്രേറ്റിന് കൈമാറി.
ശ്രീലങ്കന് തീരത്ത് മത്സ്യബന്ധനത്തിന് എത്തുന്ന ഇന്ത്യക്കാരുടെ എണ്ണം വർദ്ധിക്കുന്നതായി വടക്കൻ പ്രദേശങ്ങളിലെ മത്സ്യത്തൊഴിലാളികൾ വ്യക്തമാക്കുന്നു. നിലവിലെ സാമ്പത്തിക പ്രതിസന്ധിയും ഇന്ധനക്ഷാമവും കാരണം മത്സ്യബന്ധനത്തിന് പോകാൻ കഴിയാത്ത സാഹചര്യമാണുള്ളത്.
Comments