റിവാല്യുവേഷനിൽ ‘ബി പോസിറ്റീവ്’ എ ഗ്രേഡായി: സന്തോഷം പങ്കുവെച്ച് നടി മീനാക്ഷി

കൊച്ചി: എസ്എസ്എൽസി പുനർമൂല്യനിർണയത്തിന്റെ ഫലം വന്നപ്പോൾ ഗ്രേഡ് മാറിയതിന്റെ സന്തോഷത്തിൽ ബാലതാരം മീനാക്ഷി അനൂപ്. എസ്എസ്എൽസി റിസൾട്ട് വന്നപ്പോൾ ഫിസിക്‌സിനൊഴികെ ബാക്കി എല്ലാ വിഷയങ്ങൾക്കും മീനാക്ഷിയ്‌ക്ക് എ പ്ലസ് ആയിരുന്നു. ഒരു വിഷയത്തിന് ബി പ്ലസ് ആയതിനെ സന്തോഷത്തോടെ തന്നെ സ്വീകരിച്ച നടിയ്‌ക്ക് ഏറെ അഭിനന്ദനവും ലഭിച്ചിരുന്നു.

ഇപ്പോഴിതാ പുനർമൂല്യനിർണയത്തിലൂടെ ഫിസിക്‌സിലെ ബി പ്ലസ് എ ഗ്രേഡ് ആയതിന്റെ സന്തോഷത്തിലാണ് മീനാക്ഷി.ഞാൻ ‘ബി’ പോസിറ്റീവായിരുന്നതുകൊണ്ട് എന്നെയങ്ങ് എ ഗ്രേഡാക്കീട്ടാ എന്നാണ് പുതിയ വിവരം പങ്കുവെച്ച് മീനാക്ഷി എഴുതിയിരിക്കുന്നത്. നിരവധി പേരാണ് മീനാക്ഷിയുടെ ഈ സന്തോഷത്തിൽ പങ്കുചേർന്നിരിക്കുന്നത്.

ഈ വർഷത്തെ എസ്.എസ്.എൽ.സി പരീക്ഷയിൽ 99.26 ശതമാനം വിജയമാണ്. പരീക്ഷ എഴുതിയവരിൽ 4,23,303 കുട്ടികൾ ഉപരിപഠനത്തിനു യോഗ്യത നേടി. 44363 വിദ്യാർത്ഥികൾ മുഴുവൻ വിഷയത്തിലും എ പ്ലസ് സ്വന്തമാക്കി. കണ്ണൂർ ജില്ലയിലാണ് വിജയശതമാനം കൂടുതൽ. കുറവ് വയനാട്ടിലാണ്.