ന്യൂഡൽഹി: ഹിന്ദു വിരുദ്ധ പരാമർശം നടത്തിയ തൃണമൂൽ കോൺഗ്രസ് നേതാവ് മഹുവ മൊയിത്രയ്ക്ക് പിന്തുണയുമായി ആക്ടിവിസ്റ്റും നടിയുമായ സ്വര ഭാസ്കർ. മഹുവ മൊയിത്ര, ഗംഭീരം. അവരുടെ സ്വരത്തിന് കൂടുതൽ പിന്തുണ. ഇതായിരുന്നു സ്വര ഭാസ്കറുടെ കമന്റ്.
കാളി മാതാവിനെ അധിക്ഷേപിച്ചു കൊണ്ടുള്ള ‘കാളി‘ എന്ന ഡോക്യുമെന്ററി ചിത്രത്തിന്റെ പോസ്റ്റർ പുറത്തു വന്നതോടെ വലിയ വിവാദങ്ങളാണ് ആഗോള തലത്തിൽ ഉണ്ടായിക്കൊണ്ടിരിക്കുന്നത്. ലീന മണിമേഖലയാണ് ചിത്രം സംവിധാനം ചെയ്തത്. പോസ്റ്ററിൽ ഹിന്ദു വിരുദ്ധ ഉള്ളടക്കം കണ്ടെത്തിയതോടെ, ട്വിറ്റർ ഇത് നീക്കം ചെയ്തിരുന്നു.
സ്വവർഗ ലൈംഗികതയുടെ പ്രതീകമായ മഴവിൽ പതാകയും സിഗരറ്റും പിടിച്ചിരിക്കുന്ന കാളി ദേവിയുടെ ചിത്രം വിമർശനങ്ങൾക്ക് വഴി വെച്ചിരുന്നു. സംഭവത്തിൽ നിയമ നടപടി നേരിടുന്ന ലീന മണിമേഖലയ്ക്ക് പിന്തുണയുമായി തൃണമൂൽ എം പി മഹുവ മൊയിത്ര രംഗത്ത് വന്നിരുന്നു. കാളിദേവി മാംസഭോജിയും മദ്യപാനിയുമായ ദേവതയാണെന്നായിരുന്നു മഹുവയുടെ പരാമർശം. മഹുവ മൊയിത്രയുടെ പരാമർശത്തിനെതിരെയും വലിയ പ്രതിഷേധങ്ങൾ ഉയർന്നിരുന്നു. അവർക്കെതിരെ ഭോപ്പാലിൽ എഫ് ഐ ആർ രജിസ്റ്റർ ചെയ്തിരുന്നു.
മഹുവ മൊയിത്രയ്ക്കും സ്വര ഭാസ്കറിനുമെതിരെ സാമൂഹിക മാദ്ധ്യമങ്ങളിൽ വലിയ പ്രതികരണങ്ങളാണ് ഉയരുന്നത്. ഒരേ തൂവൽ പക്ഷികൾ ഒരുമിച്ച് പറക്കുമ്പോൾ ചിറകുകൾ കരിയാതെ സൂക്ഷിക്കുക എന്ന് ഒരാൾ കമന്റ് ചെയ്തു. നേരത്തേയും നിരവധി ഹിന്ദു വിരുദ്ധ, രാജ്യ വിരുദ്ധ പരാമർശങ്ങൾ നടത്തിയിട്ടുള്ള ആക്ടിവിസ്റ്റാണ് സ്വര ഭാസ്കർ.
