പോത്തിന്റെയും പന്നിയുടെയും ഇറച്ചിയിൽ മൈക്രോപ്ലാസ്റ്റിക് സാന്നിദ്ധ്യം; പുതിയ കണ്ടെത്തലുമായി ഗവേഷകർ

ഇറച്ചിയിൽ മൈക്രോ പ്ലാസ്റ്റിക്കിന്റെ സാന്നിദ്ധ്യം കണ്ടെത്തിയതായി ഗവേഷകർ. നെതർലാന്റ്‌സ് സൂപ്പർമാർക്കറ്റുകളിൽ നിന്ന് ശേഖരിച്ച പോത്ത്, പന്നി എന്നിവയുടെ ഇറച്ചിയിലാണ് ആദ്യമായി പ്ലാസ്റ്റിക് സാന്നിദ്ധ്യം കണ്ടെത്തുന്നത്. ആംസ്റ്റർഡാമിലെ ഒരു യൂണിവേഴ്സിറ്റിയിലെ ശാസ്ത്രജ്ഞരാണ് ഈ കണ്ടുപിടുത്തത്തിന് പിന്നിൽ.

സൂപ്പർമാർക്കറ്റിൽ വിൽപ്പനയ്‌ക്ക് വെച്ചിരിക്കുന്ന പാലിലും ഫാമുകളിലെ പാലിലും മൈക്രോപ്ലാസ്റ്റക് സാന്നിദ്ധ്യമുണ്ട്. പശു, പന്നി എന്നിവയുടെ രക്ത സാംപിളുകളിൽ പോളിയീതലെയ്ൻ , പോളീസ്റ്ററീൻ എന്നിവയുടെയും സാന്നിദ്ധ്യമാണ് കണ്ടെത്തിയത്. ബീഫ് സാംപിളുകളിലെ എട്ടെണ്ണത്തിൽ ഏഴെണ്ണത്തിലും മൈക്രോപ്ലാസ്റ്റിക് കണ്ടെത്തി. പോർക്ക് സാംപിളുകളിൽ എല്ലാത്തിലും ഇവ കണ്ടെത്തിയിട്ടുണ്ട്.

ഫാമിലെ മൃഗങ്ങൾക്ക് നൽകുന്ന ആഹാരത്തിൽ പ്ലാസ്റ്റിക്കിന്റെ സാന്നിധ്യം തെളിഞ്ഞിട്ടുണ്ട്. ഇതാകാം മൃഗങ്ങളിലെ മൈക്രോപ്ലാസ്റ്റിക്കിന്റെ പ്രധാന കാരണം എന്നാണ് നിഗമനം. മാംസം പൊതിയാൻ ഉപയോഗിച്ച പ്ലാസ്റ്റിക് ഉത്പന്നങ്ങളും ഇതിന് കാരണമായിട്ടുണ്ടോ എന്നും സംശയിക്കുന്നു.

കഴിഞ്ഞ മാർച്ചിൽ, ഗവേഷകർ ആദ്യമായി മനുഷ്യരക്തത്തിൽ മൈക്രോപ്ലാസ്റ്റിക് കണ്ടെത്തിയിരുന്നു. മൃഗങ്ങളിൽ പഠനം നടത്താനും അവർ അതേ പ്രക്രിയയാണ് പിന്തുടർന്നത്. രക്തത്തിലെ ഇത്തരം കണങ്ങൾക്ക് ശരീരത്തിലുടനീളം സഞ്ചരിക്കാനും അവയവങ്ങളിൽ തങ്ങിനിൽക്കാനും കഴിയും എന്ന് റിപ്പോർട്ടിൽ പരാമർശിക്കുന്നു.