ന്യൂഡൽഹി: എൻഡിഎയുടെ ഉപരാഷ്ട്രപതി സ്ഥാനാർത്ഥിയായി നാമനിർദ്ദേശം ചെയ്യപ്പെട്ട പശ്ചിമ ബംഗാൾ ഗവർണർ ജഗദീപ് ധൻകറിന് അഭിനന്ദനമറിയിച്ച് വൈഎസ്ആർ കോൺഗ്രസ് പാർട്ടി. ധൻകറിന് പിന്തുണയറിക്കുന്നതായി സൂചിപ്പിച്ച് കൊണ്ട് വൈഎസ്ആർസിപി എംപി വിജയസായി റെഡ്ഡിയാണ് അഭിനനമറിയിച്ചത്.
ജഗദീപ് ധൻകറിന്റെ നേതൃത്വത്തിൽ രാജ്യസഭയും ഈ ഇന്ത്യാ മഹാരാജ്യവും ഉയരങ്ങൾ കീഴടക്കുമെന്നും വിജയസായി റെഡ്ഡി പറഞ്ഞു. എപ്പോഴും മനഃസാക്ഷിക്ക് അനുസൃതമായി പ്രവർത്തിക്കുന്ന പ്രമുഖ അഭിഭാഷകനും മുൻ പാർലമെന്റേറിയനും ഗവർണറുമാണ് ജഗദീപ് ധൻകറെന്ന് അദ്ദേഹം കൂട്ടിച്ചേർത്തു.
പ്രധാനമന്ത്രി നരേന്ദ്രമോദി, കേന്ദ്ര ആഭ്യന്തരമന്ത്രി അമിത് ഷാ, പാർട്ടി ദേശീയ അദ്ധ്യക്ഷൻ ജെപി നദ്ദ എന്നിവരും മറ്റ് ബിജെപി നേതാക്കളും മന്ത്രിമാരും ഉൾപ്പെടെ ശനിയാഴ്ച ഡൽഹിയിൽ ചേർന്ന ബിജെപിയുടെ പാർലമെന്ററി ബോർഡ് യോഗത്തിലാണ് ധൻകറിന്റെ പേര് അന്തിമമായി പ്രഖ്യാപിച്ചത്. ഓഗസ്റ്റ് ആറിനാണ് ഉപരാഷ്ട്രപതി തിരഞ്ഞെടുപ്പ് നടക്കുക.
അതേസമയം നാളെയാണ് നിർണ്ണായകമായ രാഷ്ട്രപതി തിരഞ്ഞെടുപ്പ് നടക്കുന്നത്. വൈഎസ് ജഗൻ മോഹൻ റെഡ്ഡിയുടെ നേതൃത്വത്തിലുള്ള വൈഎസ്ആർസിപി തങ്ങളുടെ പിന്തുണ എൻഡിഎ സ്ഥാനാർത്ഥിയായ ദ്രൗപദി മുർമുവിന് പ്രഖ്യാപിച്ചിട്ടുണ്ട്.
Comments