ഹർഘർ തിരംഗ ക്യാമ്പെയ്ൻ; മധുരപലഹാര വിപണി കൈയേറി ത്രിവർണ്ണം

വഡോദര: ത്രിവർണ്ണ പതാകയിലെ ത്രിവർണ്ണം മധുര പലഹാരത്തിലും അവതരിപ്പിച്ച് ഗുജറാത്തിലെ വഡോദരയിലെ വിപണികൾ. സ്വാതന്ത്ര്യദിനം ആഘോഷിക്കുമ്പോൾ വിതരണം ചെയ്യാനാണ് ത്രിവർണ്ണ പലഹാരങ്ങൾ ഉണ്ടാക്കുന്നത്. പലഹാരത്തിന് രൂപം നൽകുന്നതിനായി വാനിലയ്‌ക്കൊപ്പം കുങ്കമ നിറവും പിസ്തയുമാണ് ഉപയോഗിക്കുന്നതെന്ന് വ്യാപാരികൾ പറഞ്ഞു. തിരംഗ ബർഫി, തിരംഗ മലായ് പെൻഡ എന്നിവയാണ് പ്രധാനമായും നിർമ്മിക്കുന്നതെന്നും വ്യക്തമാക്കി.

ത്രിവർണ്ണവുമായി ബന്ധപ്പെട്ട് നിരവധി ഉൽപന്നങ്ങളാണ് വിപണി കൈയേറിയിരിക്കുന്നത്. കുട്ടികളെ ആകർഷിക്കുന്ന തരത്തിലുള്ള ഉൽപ്പന്നങ്ങളും മധുരപലഹാരങ്ങളും ഇതിൽ ഉൾപ്പെടുന്നു. ത്രിവർണ്ണ നിറത്തിലുള്ള ഹെയർ ബാൻഡുകൾ,മറ്റ് അലങ്കാര വസ്തുക്കൾ എന്നിവയും മാർക്കറ്റിൽ ലഭ്യമാണ്. പരമ്പരാഗതമായി ഖാദി നിർമ്മിത പതാകകളാണ് ഉപയോഗിക്കുന്നത്. എന്നാൽ സിൽക്ക് തുണിയിൽ നിർമ്മിച്ച പതാകകളും വിപണിയിൽ ലഭ്യമാണെന്നും ഇവ വലിയ തോതിൽ വിറ്റഴിയുന്നുണ്ടെന്നും വ്യാപാരികൾ പറയുന്നു.

ഇന്ത്യയുടെ വികസനം, സുരക്ഷ, സംസ്‌കാരം എന്നിവയെ പ്രതിഫലിപ്പിക്കുന്ന വൻ മുന്നേറ്റമാണ് ഹർ ഘർ തിരംഗ ക്യാമ്പെയ്ൻ.എല്ലാ പൗരന്മാരും ഒറ്റക്കെട്ടായി നിൽക്കണം. രാജ്യത്തിന്റെ ഐക്യം ലോകത്തിന് മാതൃകയാകണമെന്നും കേന്ദ്ര ആഭ്യന്ത മന്ത്രി അമിത് ഷാ വ്യക്തമാക്കിയിരുന്നു. പൗരന്മാർ വീടുകളിൽ തീർച്ചയായും പതാക ഉയർത്തി ക്യാമ്പെയ്ൻ വൻ മുന്നേറ്റമാക്കി മാറ്റണമെന്ന് പ്രധാനമന്ത്രിയും ആവശ്യപെട്ടിരുന്നു. മുഖ്യമന്ത്രി ഭൂപേന്ദ്ര പട്ടേലിന്റെ നേതൃത്വത്തിൽ തിരംഗ മാർച്ച് സംസ്ഥാനത്ത് നടന്നിരുന്നു.