കോഴിക്കോട്: ജലനിരപ്പ് വർധിച്ചതോടെ കോഴിക്കോട് കക്കയം ഡാം തുറന്നു. അണക്കെട്ടിന്റെ ഒരു ഷട്ടറാണ് തുറന്നത്. ഡാമിലെ ജലനിരപ്പ് റെഡ് അലർട്ട് അളവിനും മുകളിൽ എത്തിയതോടെ തുറന്നുവിടുകയായിരുന്നു.
പത്ത് സെന്റിമീറ്റർ ഉയരത്തിലാണ് ഷട്ടർ തുറന്നിരിക്കുന്നത്. ഇതോടെ സെക്കൻഡിൽ എട്ട് ക്യൂബിക് മീറ്റർ വെള്ളം പുറത്തേക്ക് ഒഴുക്കിവിടാനാകും. തൽഫലമായി കുറ്റ്യാടി പുഴയിൽ വെള്ളം ഉയരാൻ സാധ്യതയുണ്ടെന്ന് അധികൃതർ വ്യക്തമാക്കി. ആവശ്യമെങ്കിൽ ഡാമിൽ നിന്ന് പുറത്തേക്ക് ഒഴുക്കുന്ന വെള്ളത്തിന്റെ അളവ് വർധിപ്പിക്കുമെന്നും അറിയിച്ചിട്ടുണ്ട്. നദീതീരത്ത് താമസിക്കുന്നവർ ജാഗ്രത പാലിക്കണമെന്നാണ് നിർദേശം.
ജലനിരപ്പ് ഉയർന്ന സാഹചര്യത്തിൽ നേരത്തെ എറണാകുളം ഇടമലയാർ ഡാമിന്റെ നാല് ഷട്ടറുകളും തുറന്നിരുന്നു. സംസ്ഥാനത്ത് മഴ കുറഞ്ഞെങ്കിലും വൃഷ്ടി പ്രദേശങ്ങളിൽ നീരൊഴുക്ക് കുറയാത്തതിനാലാണ് അണക്കെട്ടുകൾ തുറക്കേണ്ടി വരുന്നത്. കഴിഞ്ഞ ദിവസങ്ങളിലായി സംസ്ഥാനത്ത് ആകെ 33 ഡാമുകൾ തുറന്നിട്ടുണ്ടെന്നാണ് വിവരം.
Comments