ഇന്ത്യയുടെ വളർച്ച പ്രചോദിപ്പിക്കുന്നത്; ആരോഗ്യ സംരക്ഷണത്തിനും ഡിജിറ്റൽ സാങ്കേതിക വിദ്യയ്‌ക്കും മുൻഗണന നൽകിയതിന് നരേന്ദ്രമോദിയ്‌ക്ക് നന്ദി ; ബിൽ ഗേറ്റ്‌സ്

ന്യൂഡൽഹി: ഇന്ത്യയുടെ നിലവിലെ വളർച്ചയും നേട്ടങ്ങളും പ്രചോദിപ്പിക്കുന്നതാണെന്ന് മൈക്രോസോഫ്റ്റ് സഹസ്ഥാപകൻ ബിൽ ഗേറ്റ്‌സ്. ഇന്ത്യയുടെ വികസനത്തിന് നേതൃത്വം നൽകുമ്പോൾ ആരോഗ്യ സംരക്ഷണത്തിനും ഡിജിറ്റൽ പരിവർത്തനത്തിനും മുൻഗണന നൽകിയതിന് പ്രധാനമന്ത്രി നരേന്ദ്രമോദിയ്‌ക്ക് അദ്ദേഹം നന്ദി പറഞ്ഞു.

ഇന്ത്യ 76-ാം സ്വാതന്ത്ര്യദിനം ആഘോഷിക്കുന്ന ഈ വേളയിൽ, ഇന്ത്യയുടെ വികസനത്തിന് നേതൃത്വം നൽകുമ്പോൾ ആരോഗ്യ സംരക്ഷണത്തിനും ഡിജിറ്റൽ പരിവർത്തനത്തിനും മുൻഗണന നൽകിയതിന് പ്രധാനമന്ത്രിയെ ഞാൻ അഭിനന്ദിക്കുന്നു. ഈ മേഖലകളിലെ ഇന്ത്യയുടെ പുരോഗതി പ്രചോദനകരമാണ്, ഈ യാത്രയിൽ പങ്കാളിയാകാൻ ഞങ്ങൾക്ക് ഭാഗ്യമുണ്ടെന്ന് അദ്ദേഹം ട്വീറ്റ് ചെയ്തു.

അതേസമയം ചെങ്കോട്ടയിൽ രാജ്യത്തെ അഭിസംബോധന ചെയ്ത പ്രധാനമന്ത്രി അഞ്ച് ദൗത്യങ്ങളാണ് പൗരന്മാർക്ക് മുന്നിലേക്ക് വെച്ചത്.വികസിത ഭാരതം, അടിമത്ത മനോഭാവം അവസാനിപ്പിക്കൽ,പൈതൃകത്തിൽ അഭിമാനിക്കുക,ഏകത പൗരധർമ്മം പാലിക്കൽ എന്നതാണ് അഞ്ച് ദൗത്യങ്ങൾ.

അടുത്ത 25 വർഷം രാജ്യത്തിന് അതിനിർണായകമെന്നും പ്രധാനമന്ത്രി ചൂണ്ടിക്കാട്ടിയിരുന്നു.സമ്പൂർണ വികസിത ഭാരതമാണ് ലക്ഷ്യം. ഐക്യവും അഖണ്ഡതയും കാത്തു സൂക്ഷിക്കണമെന്ന് അദ്ദേഹം നിർദ്ദേശിച്ചു.

കുടുംബാധിപത്യവും അഴിമതിയും രാജ്യത്ത് നിന്ന് തുടച്ച് നീക്കാൻ ജനങ്ങളോട് പ്രധാനമന്ത്രി സഹായം അഭ്യർത്ഥിച്ചു. ഇതിനെതിരെ ഒരു വിപ്ലവം ആരംഭിക്കേണ്ടതുണ്ട്. ഇത് നമ്മുടെ സാമൂഹിക ഉത്തരവാദിത്തമാണ്. നമുക്ക് സുതാര്യത ആവശ്യമാണെന്ന് അദ്ദേഹം പറഞ്ഞു. ഓരോ ഇന്ത്യക്കാരനും മാതൃഭാഷയിൽ അഭിമാനിക്കണം. വിദേശ സംസ്‌ക്കാരത്തെ അതേപടി അനുകരിക്കേണ്ട. നാം എങ്ങനെയോ അങ്ങനെ തന്നെ ആകണമെന്നും അതിൽ തുടരണമെന്നും പ്രധാനമന്ത്രി കൂട്ടിച്ചേർത്തു.