തിരുവനന്തപുരം നഗരസഭയുടെ വഴിയോരക്കച്ചവട മേള; മാദ്ധ്യമ പുരസ്‌കാരം ജനം ടിവിക്ക്; അഖിൽ പാലോട്ട് മഠത്തിന് മികച്ച റിപ്പോർട്ടർക്കുളള പുരസ്‌കാരം

തിരുവനന്തപുരം: തിരുവനന്തപുരം നഗരസഭയുടെ വഴിയോരക്കച്ചവട മേളയുടെ ഭാഗമായുള്ള മാധ്യമ പുരസ്‌കാരം ജനംടിവിക്ക്. ജനം ടിവി തിരുവനന്തപുരം ബ്യൂറോയിലെ അഖിൽ പാലോട്ട് മഠത്തിനാണ് മികച്ച റിപ്പോർട്ടർക്കുളള പുരസ്‌കാരം ലഭിച്ചത്. മേളയുടെ സമാപന സമ്മേളനത്തിൽ മേയർ ആര്യ രാജേന്ദ്രനിൽ നിന്ന് അഖിൽ പുരസ്‌കാരം ഏറ്റുവാങ്ങി.

സ്വാതന്ത്ര്യത്തിന്റെ 75-ാം വാർഷികത്തോടനുബന്ധിച്ചുള്ള”സ്വാതന്ത്ര്യം തന്നെ അമൃതം” ആഘോഷ പരിപാടികളുടെ ഭാഗമായാണ് നഗരസഭ മേള സംഘടിപ്പിച്ചത്. മേളയുടെ തുടക്കം മുതൽ സമഗ്രമായ ദൃശ്യ വാർത്തകൾ ജനം ടിവി ജനങ്ങളിൽ എത്തിച്ചിരുന്നു. ഇത് പരിഗണിച്ചാണ് പുരസ്‌കാരം.

8 ദിവസമാണ് മേള നീണ്ടുനിന്നത്. കനകകുന്നിൽ നടന്ന സമാപന സമ്മേളനം മന്ത്രി എം.വി ഗോവിന്ദൻ മാസ്റ്റർ ഉദ്ഘാടനം ചെയ്തു. തിരുവനന്തപുരത്തിന് പുത്തൻ അനുഭവങ്ങൾ സമ്മാനിച്ചാണ് വഴിയോര കച്ചവട മേള സമാപിച്ചതെന്ന് മേയർ ആര്യ രാജേന്ദ്രൻ പറഞ്ഞു. മേളയ്‌ക്ക് നഗരവാസികൾ വലിയ സ്വീകാര്യതയാണ് നൽകിയതെന്നും ജനപങ്കാളിത്തം കൊണ്ടും വ്യത്യസ്ഥമായിരുന്നു മേളയെന്നും മേയർ കൂട്ടിച്ചേർത്തു.

ജയ്‌സൺ ഫ്രാൻസിസ് (സീനിയർ റിപ്പോർട്ടർ,ദേശാഭിമാനി), ഷിബിൻ ചെറുകര (ക്യാമറാമാൻ ദേശാഭിമാനി), അൽ അമീൻ (ചീഫ് റിപ്പോർട്ടർ 24ന്യൂസ്), ജിനു എസ് രാജ് (ക്യാമറ, 24 ന്യൂസ്) എന്നിവർക്കും മാദ്ധ്യമ പുരസ്‌കാരങ്ങൾ ലഭിച്ചു.