യുഎസ് സർക്കാരിന്റെ ഭാഗമായി ഇന്ത്യൻ വംശജരും; 130-ഓളം പേരെ സുപ്രധാന ചുമതലകൾ ഏൽപ്പിച്ച് ബൈഡൻ

വാഷിംഗ്ടൺ: ഇന്ത്യൻ അമേരിക്കൻ വംശജർക്ക് പ്രധാന തസ്തികകളിൽ നിയമനം നൽകി അമേരിക്കൻ പ്രസിഡന്റ് ജോ ബൈഡൻ. 130-ഓളം പേരെയാണ് ഇത്തരത്തിൽ സുപ്രധാന ചുമതലകൾ ഏൽപ്പിച്ചിരിക്കുന്നത്. അമേരിക്കൻ ജനസംഖ്യയുടെ ഒരു ശതമാനത്തോളം വരുമിത്.

മികച്ച സേവനം കാഴ്ച വെയ്‌ക്കുന്നവരാണ് ഇന്ത്യൻ വംശജരെന്നും അവരുടെ ഉത്സാഹവും പ്രതിബദ്ധതയും വിവിധ മേഖലകളിൽ ഗുണം ചെയ്യുമെന്നും സിലിക്കൺ വാലിയിലെ സംരംഭകനായ രംഗസ്വാമി പറഞ്ഞു. ഇന്ത്യൻ ജനതയ്‌ക്ക് വൻ സ്വീകാര്യതയാണ് പ്രസിഡന്റ് നൽകുന്നതെന്നും അദ്ദേഹം കൂട്ടിച്ചേർത്തു.

2020-ലെ തിരഞ്ഞെടുപ്പിൽ വിവിധ സംസ്ഥാന, ഫെഡറൽ തലങ്ങളിൽ 40-ലധികം ഇന്ത്യൻ-അമേരിക്കൻ വംശജർ തിരഞ്ഞെടുക്കപ്പെട്ടിരുന്നു. റോ ഖന്ന, രാജാ കൃഷ്ണമൂർത്തി, ഡോ. അമി ബേര, പ്രമീള ജയപാൽ എന്നിവർ യുഎസ് പ്രതിനിധി സഭയിലേക്കും തിരഞ്ഞെടുക്കപ്പെട്ടു.

യുഎസ് സർക്കാരിന്റെ എല്ലാ വകുപ്പുകളിലും ഇന്ത്യൻ വംശജരുടെ സാന്നിധ്യമുണ്ട്. ബൈഡൻ യുഎസ് സെനറ്ററായി സേവനമനുഷ്ഠിച്ചതുമുതൽ ഇന്ത്യൻ സമൂഹവുമായി ദൃഢ ബന്ധം പുലർത്തിയിരുന്നു.കൂടാതെ 2020-ൽ കമല ഹാരിസിനെ വൈസ് പ്രസിഡന്റായി തിരഞ്ഞെടുക്കുകയും ചെയ്തു.