കോഴിക്കോട്: ശക്തമായ മഴ തുടരുന്ന സാഹചര്യത്തിൽ കക്കയം ഡാമിൽ ബ്ലൂ അലർട്ട് പ്രഖ്യാപിച്ചു. ഡാമിൽ ജലനിരപ്പ് 755.50 മീറ്ററിൽ എത്തി. ഡാമിൽ നിന്ന് അധിക ജലം ഒഴുക്കി വിടുന്നതിന്റെ പ്രാരംഭ നടപടികളുടെ ഭാഗമായാണ് ബ്ലൂ അലർട്ട് പ്രഖ്യാപിച്ചിരിക്കുന്നത്. കുറ്റ്യാടി പുഴയുടെ കരകളിൽ താമസിക്കുന്നവർ ജാഗ്രത പാലിക്കണമെന്ന് കോഴിക്കോട് കളക്ടർ അറിയിച്ചു. ഡാമിലെ ജലനിരപ്പ് 757.5 മീറ്ററായാൽ ഷട്ടറുകൾ തുറക്കും.
അതേസമയം, മഴ ശക്തമായ സാഹചര്യത്തിൽ എറണാകുളം ഇടമലയാർ ഡാമിൽ റെഡ് അലർട്ട് പ്രഖ്യാപിച്ചിട്ടുണ്ട്. മഴ കനത്തതോടെ ഡാമിൽ ജലനിരപ്പ് ഉയരുന്നതിനാലാണ് മുന്നറിയിപ്പ് നൽകിയിരിക്കുന്നത്. നിലവിൽ ഡാമിലെ ജലനിരപ്പ് 163.5 അടിയാണ്. 164 അടിയാണ് ഡാമിലെ പരമാവധി സംഭരണ ശേഷി. ജലനിരപ്പ് ഉയരുന്ന സാഹചര്യമാണെങ്കിൽ അണക്കെട്ടിന്റെ ഷട്ടറുകൾ തുറക്കും.
ഡാമിന്റെ വൃഷ്ടി പ്രദേശത്ത് ശക്തമായ മഴയാണ് പെയ്യുന്നത്. കൂടാതെ,വരും മണിക്കൂറുകളിൽ എറണാകുളം അടക്കമുള്ള ജില്ലകളിൽ ശക്തമായ മഴ പെയ്യും എന്ന് മുന്നിയിപ്പ് വന്നതോടെയാണ് ഇടമലയാർ ഡാമിൽ റെഡ് അലർട്ട് പ്രഖ്യാപിച്ചത്. റൂൾ ലെവൽ പ്രകാരം ഡാമിലെ ജലനിരപ്പ് 164 അടി എത്തിയാൽ ഷട്ടറുകൾ തുറന്ന് അധിക ജലം പുറത്തേക്ക് ഒഴുക്കും
Comments