കൊറോണയ്‌ക്ക് ശേഷമുള്ള തിരുവോണം വിപുലമായാണ് നാടെങ്ങും ആഘോഷിച്ചത്. ഇപ്പോഴിതാ ഓണനാളിൽ കഥകളിക്കൊപ്പമുള്ള ഗംഭീര ഫോട്ടോഷൂട്ട് പങ്കുവെച്ച് സമൂഹ മാദ്ധ്യമങ്ങളിൽ ശ്രദ്ധ നേടിയിരിക്കുകയാണ് മലയാളികളുടെ പ്രിയതാരം അനുശ്രീ. ആരാധകർക്ക് തിരുവോണദിനാശംസകൾ അറിയിച്ച് കൊണ്ടാണ് താരം ചിത്രങ്ങൾ പങ്കുവച്ചിരിക്കുന്നത്.
കായൽ പശ്ചാത്തലമാക്കി തോണിയിൽ കഥകളിക്കൊപ്പം നാടൻ വേഷത്തിൽ ഇരിക്കുന്ന ചിത്രങ്ങളാണ് ഇവ.നിറപറയും,നിലവിളക്കും, തുമ്പപൂക്കളും, പൂമ്പാറ്റയും, ഓണക്കോടിയും, ഒരുപിടി നല്ല ഓർമകളും മനസ്സിൽ നിറച്ച് വീണ്ടും ഒരോണം കൂടി വന്നെത്തി. ഗൃഹാതുരതയുടെയും സന്തോഷത്തിന്റെയും സമ്മിശ്രമായ ഈ ഓണനാളുകളിൽ ഒത്തിരി സ്‌നേഹത്തോടെ എല്ലാവർക്കും ഹൃദയം നിറഞ്ഞ തിരുവോണദിനാശംസകൾ എന്ന കുറിപ്പോടെയാണ് താരം ചിത്രങ്ങൾ പങ്കുവച്ചിരിക്കുന്നത്.
ചിത്രം പങ്കുവച്ചതിന് പിന്നാലെ നിരവധി പേരാണ് താരത്തിന് ആശംസകളുമായി എത്തിയിരിക്കുന്നത്. അതേസമയം ഇതിന് മുമ്പും അനുശ്രീയുടെ ഷോട്ടോഷൂട്ടുകൾ വൈറലായിരുന്നു. ജന്മാഷ്ടമി ദിനത്തിൽ ശ്രീകൃഷ്ണന്റെ വേഷത്തിൽ താരം നടത്തിയ ഷോട്ടോഷൂട്ടാണ് വൈറലായത്.
അനുശ്രീയുടേതായി ഏറ്റവും ഒടുവിൽ പ്രദർശനത്തിന് എത്തിയത് മോഹൻലാൽ നായകനായ ‘ട്വൽത്ത് മാനാ’ണ്. ജീത്തു ജോസഫ് ആണ് ചിത്രം സംവിധാനം ചെയ്തത്. ചിത്രത്തിൽ നിർണായകമായ ഒരു കഥാപാത്രത്തെ അവതരിപ്പിച്ച അനുശ്രീക്ക് ഏറെ പ്രശംസ ലഭിച്ചിരുന്നു. ദെസ്വിൻ പ്രേം സംവിധാനം ചെയ്യുന്ന ‘താര’ എന്ന ഒരു ചിത്രമാണ് ഇനി അനുശ്രീയുടേതായി പ്രദർശനത്തിന് എത്താനുള്ളത്.അനുശ്രീയുടെ കഥാപാത്രത്തെ കേന്ദ്രീകരിച്ചിട്ടുള്ളതാണ് ചിത്രം.
Comments