ന്യൂഡൽഹി: ബ്രിട്ടീഷ് പ്രധാനമന്ത്രിയായി ചുമതലയേറ്റ ലിസ് ട്രസിനെ ടെലിഫോണിൽ വിളിച്ച് അഭിനന്ദനം അറിയിച്ച് പ്രധാനമന്ത്രി നരേന്ദ്ര മോദി. എലിസബത്ത് രാജ്ഞിയുടെ വിയോഗത്തിൽ ലിസ് ട്രസിനെ പ്രധാനമന്ത്രി അനുശോചനം അറിയിച്ചു. ഇന്ത്യയും ബ്രിട്ടണും തമ്മിലുള്ള സ്വതന്ത്ര വ്യാപാര സഹകരണവുമായി ബന്ധപ്പെട്ടും പ്രധാനമന്ത്രി മോദി, ലിസ് ട്രസുമായി ആശയവിനിമയം നടത്തി.
വ്യാപാര സെക്രട്ടറി, വിദേശകാര്യ സെക്രട്ടറി എന്നീ നിലകളിൽ പ്രവർത്തിച്ചപ്പോൾ ഇന്ത്യയുമായി ലിസ് ട്രസ് മികച്ച സഹകരണം കാത്ത് സൂക്ഷിച്ചിരുന്നു. ഇത് അഭിനന്ദനാർഹമാണെന്നും പ്രധാനമന്ത്രി പറഞ്ഞു.
ഉഭയകക്ഷി പങ്കാളിത്തം, വാണിജ്യ- വ്യാപാര സഹകരണം, പ്രതിരോധ- സുരക്ഷാ സഹകരണം എന്നിവയുമായി ബന്ധപ്പെട്ട വിഷയങ്ങളിൽ ഇരു നേതാക്കളും ഹ്രസ്വസംഭാഷണം നടത്തി. ഇന്ത്യയും യുകെയും തമ്മിലുള്ള നയതന്ത്ര സഹകരണം ശക്തിപ്പെടുത്തുന്നതുമായി ബന്ധപ്പെട്ട കാര്യങ്ങളും പ്രധാനമന്ത്രിമാർ പരസ്പരം സംസാരിച്ചു.
Comments