കണ്ടക്ടർ ഇല്ല, ഒരു സ്റ്റോപ്പ് മാത്രം, ബുക്കിംഗ് ഞായറാഴ്ച മുതൽ; കെ എസ് ആർ ടി സിയുടെ പുത്തൻ പരിഷ്കാരം ഇങ്ങനെ- End to End service by KSRTC

തിരുവനന്തപുരം: കണ്ടക്ടർ രഹിത ബസ് സർവീസുമായി കെ എസ് ആർ ടി സി. ദീർഘദൂര യാത്രക്കാർക്ക് അതിവേഗം തിരുവനന്തപുരത്ത് നിന്നും എറണാകുളത്തേക്കും തിരികെയും പോകാൻ എൻഡ് ടു എൻഡ് സംവിധാനമാണ് കെ എസ് ആർ ടി സി ആരംഭിക്കുന്നത്. അവധി ദിവസങ്ങൾ ഒഴികെ മറ്റെല്ലാ ദിവസങ്ങളിലും സർവീസ് നടത്താനാണ് ആലോചന.

എസി ലോ ഫ്ലോർ ബസുകളാണ് ഇത്തരത്തിൽ സർവീസ് നടത്താനായി തിരഞ്ഞെടുത്തിരിക്കുന്നത്. തിരുവനന്തപുരത്ത് നിന്നും രാവിലെ 5.10ന് ആരംഭിച്ച് 9.40ന് എറണാകുളത്ത് എത്തുകയും തിരിച്ച് വൈകിട്ട് 5.20ന് എറണാകുളത്ത് നിന്നും ആരംഭിച്ച് 9.50ന് തിരുവനന്തപുരത്ത് എത്തുകയും ചെയ്യുന്ന തരത്തിലാണ് ക്രമീകരണം.

യാത്രക്കാരെ കയറ്റുന്നതിനായി കൊല്ലം അയത്തിൽ ഫീഡർ സ്റ്റേഷനിലും ആലപ്പുഴ കൊമ്മാടി ഫീഡർ സ്റ്റേഷനിലും ഒരു മിനിട്ട് മാത്രമായിരിക്കും ബസുകൾ നിർത്തുക. യാത്രക്കാർക്ക് ഞായറാഴ്ച മുതൽ ഓൺലൈനായി ടിക്കറ്റുകൾ ബുക്ക് ചെയ്യുവാൻ സാധിക്കും. പുഷ് ബാക്ക് സീറ്റുള്ള രണ്ട് ബസ്സുകളാണ് എൻഡ് ടു എൻഡ് സർവീസിനായി മാറ്റി വെച്ചിരിക്കുന്നത്. ഓഫ് ലൈനായി, ബസ് പുറപ്പെടുന്നതിന് അര മണിക്കൂർ മുൻപ് തിരുവനന്തപുരം സെൻട്രൽ ബസ് സ്റ്റാൻഡിൽ നിന്നും കൊല്ലം അയത്തിൽ, ആലപ്പുഴ കൊമ്മാടി ഫീഡർ സ്റ്റേഷനുകളിൽ നിന്നും ടിക്കറ്റുകൾ ബുക്ക് ചെയ്യാവുന്നതാണ്.