ഇസ്ലാമാബാദ്: പാകിസ്താനിൽ സൈനിക ഹെലികോപ്റ്റർ തകർന്ന് വീണ് ആറ് പട്ടാളക്കാർ കൊല്ലപ്പെട്ടു. മേജർ മുഹമ്മദ് അഫ്‌സൽ, മേജർ ഖുറാം ഷഹ്‌സാദ്, സുബേദാർ അബ്ദുൾ വാഹിദ്, ശിപായി മുഹമ്മദ് ഇമ്രാൻ, ശിപായി ഷൊയ്ബ്, നായിക് ജലീൽ എന്നിവരാണ് കൊല്ലപ്പെട്ടത്. ബലൂചിസ്ഥാനിലെ ഖോസ്റ്റിലായിരുന്നു സംഭവം.
പരിശീലന പറക്കലിനിടെയായിരുന്നു അപകടം എന്നാണ് വിവരം. കൊല്ലപ്പെട്ട ആറ് പേർ മാത്രമാണ് ഹെലികോപ്റ്ററിൽ ഉണ്ടായിരുന്നത്. സാങ്കേതിക പ്രശ്‌നമാണ് അപകടത്തിന് കാരണം എന്നാണ് പ്രാഥമിക നിഗമനം. സംഭവത്തിൽ പാക് സൈന്യം അന്വേഷണം പ്രഖ്യാപിച്ചിട്ടുണ്ട്.
കൊല്ലപ്പെട്ട സൈനികരുടെ മൃതദേഹങ്ങൾ ആശുപത്രിയിൽ സൂക്ഷിച്ചിരിക്കുകയാണ്. അപകടം സംബന്ധിച്ച കൂടുതൽ വിവരങ്ങൾ സൈന്യം പുറത്തുവിട്ടിട്ടില്ല.
കഴിഞ്ഞ ഓഗസ്റ്റിലും സൈനിക ഹെലികോപ്റ്റർ തകർന്ന് ആറ് സൈനികർ കൊല്ലപ്പെട്ടിരുന്നു. ആർമി ജനറലും, അഞ്ച് മുതിർന്ന സൈനിക ഉദ്യോഗസ്ഥരുമാണ് കൊല്ലപ്പെട്ടത്. ഹെലികോപ്റ്ററിന്റെ സാങ്കേതിക പ്രശ്‌നമായിരുന്നു ഈ അപകടത്തിനും പിന്നിൽ.
Comments