തിരുവനന്തപുരം : പാർട്ടി ബന്ധുക്കൾക്ക് നിയമനം നൽകുന്നതിന്റെ കൂടുതൽ തെളിവുകൾ പുറത്ത്. സിപിഎം ജില്ലാ സെക്രട്ടറി ആനാവൂർ നാഗപ്പന്റെ പേരിലാണ് അടുത്ത കത്തും പുറത്ത് വന്നത്. തിരുവനന്തപുരം ജില്ലാ മർക്കന്റെയിൽ സഹകരണ സംഘത്തിൽ മൂന്ന് പേരെ നിയമിക്കാനാണ് ആനാവൂരിന്റെ കത്തിൽ പറയുന്നത് . നഗരസഭാ നിയമനക്കത്തിലെ വിവാദം തുടരുമ്പോഴാണ് പുതിയ കത്ത് പുറത്താകുന്നത്.
സഖാവേ എന്ന് അഭിസംബോധന ചെയ്യുന്നതാണ് കത്ത്. ജൂനിയർ ക്ലർക്ക് വിഭാഗത്തിൽ രണ്ടും ഡ്രൈവറായി മറ്റൊരാളെയും നിയമിക്കാനാണ് കത്തിൽ ആനാവൂരിന്റെ നിർദ്ദേശം. ജൂനിയർ ക്ലർക്ക് വിഭാഗത്തിൽ മഞ്ജു വിഎസിനേയും, കിരൺ ജെ എസിനേയും ഡ്രൈവർ വിഭാഗത്തിൽ ഷിബിൻ രാജ് ആർ എസിനേയും നിയമിക്കണമെന്നാണ് കത്തിലുള്ള നിർദ്ദേശം. അതേസമയം അറ്റന്റർ വിഭാഗത്തിൽ ഉടൻ നിയമനം വേണ്ടെന്നും കത്തിൽ നിർദ്ദേശമുണ്ട്.
വിവാദകത്തിൽ പക്ഷേ ആനാവൂരിന്റെ പ്രതികരണം നിലവിൽ വന്നിട്ടില്ല. നഗരസഭാ കത്തിൽ വിവാദങ്ങൾ തുടരുകയും പ്രതിഷേധം ശക്തമാകുമ്പോഴുമാണ് സിപിഎം ആനാവൂരിന്റെ പുതിയ കത്തിൽ പ്രതിരോധത്തിലാകുന്നത്. സഹകരണ മേഖലയിലെ നിയമനത്തിലാണ് സിപിഎം ഇടപെടൽ വ്യക്തമാക്കുന്ന കത്ത് പുറത്തായത്.
