ന്യൂഡൽഹി: നാഷണൽ കോൺഫറൻസ് അദ്ധ്യക്ഷ പദവി ഒഴിഞ്ഞ് ജമ്മു കശ്മീർ മുൻ മുഖ്യമന്ത്രി ഫറൂഖ് അബ്ദുള്ള. ജമ്മു കശ്മീരിൽ തിരഞ്ഞെടുപ്പ് നടക്കാനിരിക്കെയാണ് അബ്ദുള്ളയുടെ രാജി. തീരുമാനം പുന:പരിശോധിക്കാനുള്ള സഹപ്രവർത്തകരുടെ അപേക്ഷകൾ അബ്ദുള്ള ചെവിക്കൊണ്ടില്ല.
അബ്ദുള്ളയുടെ അപ്രതീക്ഷിതമായ തീരുമാനം പാർട്ടി അണികളെ ഞെട്ടിച്ചിരിക്കുകയാണ്. നാഷണൽ കോൺഫറൻസിൽ സംഘടനാ തിരഞ്ഞെടുപ്പ് ഡിസംബറിൽ നടക്കാനിരിക്കുകയാണ്. അതു വരെ അബ്ദുള്ള കാവൽ അദ്ധ്യക്ഷനായി തുടരുമെന്നാണ് വിവരം.
2019ൽ ആർട്ടിക്കിൾ 370 റദ്ദാക്കിയതിന് ശേഷം ജമ്മു കശ്മീരിൽ ആദ്യമായി തിരഞ്ഞെടുപ്പ് നടക്കാനിരിക്കെയാണ് ഫറൂഖ് അബ്ദുള്ളയുടെ രാജി. ജമ്മു കശ്മീരിൽ തിരഞ്ഞെടുപ്പ് നടത്താൻ ആവശ്യപ്പെട്ട നേതാക്കളിൽ മുൻപന്തിയിലായിരുന്നു ഫറൂഖ് അബ്ദുള്ള. അബ്ദുള്ളയുടെ പിന്മാറ്റം തോൽവി ഭയന്നാണ് എന്ന അഭ്യൂഹങ്ങളും പ്രചരിക്കുന്നുണ്ട്.
ജമ്മു കശ്മീരിൽ തിരഞ്ഞെടുപ്പ് തീയതി ഇനിയും പ്രഖ്യാപിച്ചിട്ടില്ല. 2023 ആദ്യം തിരഞ്ഞെടുപ്പ് നടക്കും എന്നാണ് സൂചന.
Comments