കോതിയിൽ ഇന്ന് ഹർത്താൽ

കോഴിക്കോട്: ശുചിമുറി മാലിന്യപ്ലാന്റ് സ്ഥാപിക്കുന്നതിനെതിരെ കോതിയിൽ പ്രതിഷേധക്കാർ പ്രഖ്യാപിച്ച ഹർത്താൽ തുടങ്ങി. കോർപ്പറേഷനിലെ 57, 58, 59 ഡിവിഷനുകളിൽ ഉൾപ്പെടുന്ന തെക്കേപ്പുറം പരിസര മേഖലയിലാണ് ഇന്ന് പ്രാദേശിക ഹർത്താലുള്ളത്. കുറ്റിച്ചിറ, കുണ്ടുങ്ങൽ, ഇടിയങ്ങര, പള്ളിക്കണ്ടി, കുത്തുകല്ല്, നൈനാംവളപ്പ് എന്നീ മേഖലകൾ ഹർത്താലിൽ ഉൾപ്പെടും. രാവിലെ ആറ് മണിക്ക് തുടങ്ങിയ ഹർത്താൽ വൈകിട്ട് ആറ് മണി വരെ ഉണ്ടാകുമെന്നാണ് പ്രതിഷേധക്കാർ അറിയിക്കുന്നത്.

ശുചിമുറി മാലിന്യപ്ലാന്റിനെതിരെ കഴിഞ്ഞ രണ്ട് ദിവസമായി വലിയ പ്രതിഷേധമാണ് കോതിയിൽ തുടരുന്നത്. ജനകീയ പ്രതിരോധ സമിതിയുടെ നേതൃത്വത്തിൽ നിരവധി പ്രദേശവാസികൾ റോഡ് ഉപരോധിച്ചിരുന്നു. സ്ത്രീകളും കുട്ടികളും അടക്കമുള്ളവരാണ് പ്രതിഷേധത്തിൽ പങ്കെടുത്തത്. ഇവരെ പോലീസ് ബലം പ്രയോഗിച്ച് മാറ്റി. അതേസമയം മാലിന്യപ്ലാന്റ് സ്ഥാപിക്കുന്നതിൽ നിന്ന് ഒരുകാരണവശാലും പിൻമാറില്ലെന്ന നിലപാടിലാണ് കോർപ്പറേഷൻ.

കോടതിയിൽ നിന്ന് അനുകൂല വിധി കിട്ടിയതിനെ തുടർന്നായിരുന്നു കോർപ്പറേഷൻ അധികൃതർ ശുചിമുറി മാലിന്യപ്ലാന്റ് നിർമാണവുമായി മുന്നോട്ടുവന്നത്. എന്നാൽ തീരദേശ പരിപാലന നിയമം ലംഘിച്ചാണ് മാലിന്യ പ്ലാന്റ് നിർമ്മിക്കുന്നതെന്നും ഇതിനെതിരെ ഹൈക്കോടതിയെ സമീപിക്കാനാണ് നീക്കമെന്നും കോതിയിലെ ജനങ്ങൾ അറിയിച്ചു.