ന്യൂഡൽഹി: ഭരണഘടനാ മൂല്യങ്ങൾ ഉയർത്തിപ്പിടിച്ച് രാജ്യം ഇന്ന് ഭരണഘടനാ ദിനം ആചരിക്കും. ഇതിന്റെ ഭാഗമായി രാജ്യത്തെ വിവിധയിടങ്ങളിൽ ആഘോഷപരിപാടികൾ സംഘടിപ്പിക്കും. സുപ്രീംകോടതി സംഘടിപ്പിക്കുന്ന ആഘോഷപരിപാടി പ്രധാനമന്ത്രി നരേന്ദ്ര മോദി ഉദ്ഘാടനം ചെയ്യും.
രാവിലെ 10 മണിയോടെയാണ് സുപ്രീംകോടതിയുടെ നേതൃത്വത്തിലുള്ള ആഘോഷ പരിപാടികൾ ആരംഭിക്കുക. ചീഫ് ജസ്റ്റിസ് ഡിവൈ ചന്ദ്രചൂഡ് അദ്ധ്യക്ഷത വഹിക്കും. പരിപാടിയിൽ ഇ- കോർട്ട് പദ്ധതിയുടെ ഭാഗമായുള്ള വിവിധ പ്രവർത്തനങ്ങൾക്ക് പ്രധാനമന്ത്രി തുടക്കം കുറിക്കും. കോടതി നടപടികൾ സുതാര്യമാക്കാനും, വിവരങ്ങൾ എളുപ്പം ലഭ്യമാക്കാനും ഉദ്ദേശിച്ചുകൊണ്ടുള്ള പദ്ധതിയാണ് ഇ-കോർട്ട്. ഇതിനായുള്ള മൊബൈൽ ആപ്പ് കഴിഞ്ഞ മെയ്യിൽ പ്രധാനമന്ത്രി രാജ്യത്തിന് സമർപ്പിച്ചിരുന്നു.
2015 മുതലാണ് നവംബർ 26 രാജ്യം ഭരണഘടനാ ദിനമായി ആചരിക്കാൻ ആരംഭിച്ചത്. പൗരന്മാർക്കിടയിൽ ഭരണഘടനാ മൂല്യങ്ങൾ പ്രോത്സാഹിപ്പിക്കുന്നതിന് വേണ്ടിയാണ് എല്ലാ വർഷവും ഭരണഘടനാ ദിനമായി ആചരിക്കുന്നത്. അതിന് മുൻപ് വരെ ഈ ദിവസം ദേശീയ നിയമ ദിനമായിട്ട് ആയിരുന്നു ആചരിച്ചിരുന്നത്. 1949 ൽ ഭരണഘടനാ അസംബ്ലിയുടെ അവസാന സമ്മേളനം ഭരണഘടന അംഗീകരിച്ച ദിവസം കൂടിയാണ് ഇന്ന്.
