ന്യൂഡൽഹി: യുഎപിഎ കേസിൽ അലൻ ഷുഹൈബിന്റെ ജാമ്യം റദ്ദാക്കണമെന്നാവശ്യപ്പെട്ട് എൻഐഎ. ഇത് സംബന്ധിച്ച് കൊച്ചിയിലെ എൻഐഎ കോടതിയിൽ അപേക്ഷ നൽകി. ജാമ്യ വ്യവസ്ഥ അലൻ ഷുഹൈബ് ലംഘിച്ചുവെന്ന്് ആരോപിച്ച് സംസ്ഥാന പോലീസും കഴിഞ്ഞ ദിവസം റിപ്പോർട്ട് നൽകിയിരുന്നു. ഇതിന് പിന്നാലെയാണ് എൻഐഎയും ജാമ്യം റദ്ദാക്കണമെന്ന് ആവശ്യപ്പെട്ട് കോടതിയെ സമീപിച്ചത്.
മറ്റൊരു കേസിൽ ഉൾപ്പെടാൻ പാടില്ല എന്നതടക്കമുള്ള കർശന ഉപാധികളോടെയാണ് പന്തീരങ്കാവ് യുഎപിഎ കേസിൽ എൻഐഎ കോടതി അലൻ ഷുഹൈബിന് ജാമ്യം നൽകിയിരുന്നത്. എന്നാൽ ഈ മാസം ആദ്യം കണ്ണൂർ പാലയാട് ലോ കോളേജിൽ ക്യാമ്പസിൽ വെച്ച് വിദ്യാർത്ഥികളെ അക്രമിച്ചെന്ന് കാട്ടി എസ്എഫ്‌ഐ അലനെതിരെ പരാതി നൽകിയിരുന്നു. ഈ പരാതിയിൽ അലനെതിരെ ധർമ്മടം പോലീസ് കേസെടുത്തിരുന്നു. ഈ കേസ് ചൂണ്ടിക്കാട്ടിയാണ് പന്നിയങ്കര പോലീസ് സ്റ്റേഷൻ ഹൗസ് ഓഫീസർ എൻഐഎ കോടതിയിൽ റിപ്പോർട്ട് നൽകിയിരിക്കുന്നത്.
അലന്റെ വീട് പന്നിയങ്കര സ്റ്റേഷൻ പരിധിയിലായതിനാൽ ജാമ്യ വ്യവസ്ഥ ലംഘിക്കുന്നുണ്ടോയെന്ന് നിരീക്ഷിക്കാനുള്ള ചുമതല പന്നിയങ്കര എസ്എച്ച്ഒക്കായിരുന്നു. ഈ റിപ്പോർട്ടിന്റെ അടിസ്ഥാനത്തിൽ അലന്റെ ജാമ്യം റദ്ദ് ചെയ്യണോയെന്ന കാര്യത്തിലടക്കം തീരുമാനമെടുക്കേണ്ടത് എൻഐഎ കോടതിയാണ്.
Comments