മുല്ലപ്പെരിയാറിൽ ആശ്വാസം; വൃഷ്ടിപ്രദേശത്ത് മഴ കുറഞ്ഞു; വെള്ളത്തിന്റെ അളവ് ഉയർത്തി തമിഴ്‌നാട്; ജലനിരപ്പ് 141 അടി

ഇടുക്കി: മുല്ലപ്പെരിയാർ അണക്കെട്ടിൽ ജലനിരപ്പ് ഉയരുന്നു. കഴിഞ്ഞ ദിവസങ്ങളിൽ പെയ്ത മഴയിൽ അണക്കെട്ടിലെ ജലനിരപ്പ് 141.40 അടിയായി ഉയർന്നിട്ടുണ്ട്. അതേസമയം അണക്കെട്ടിൽ നിന്നും കൊണ്ടുപോകുന്ന വെള്ളത്തിന്റെ അളവ് തമിഴ്‌നാട് വർദ്ധിപ്പിച്ചു.

മാൻദൗസ് ചുഴലിക്കാറ്റിന്റെ ഫലമായി അണക്കെട്ടിന്റെ വൃഷ്ടി പ്രദേശത്ത് ശക്തമായ മഴയാണ് ലഭിച്ചിരുന്നത്. ഇതോടെ അണക്കെട്ടിലേക്കുള്ള നീരൊഴുക്ക് വർദ്ധിക്കുകയും ജലനിരപ്പ് വേഗത്തിൽ ഉയരുകയും ചെയ്തു. തുടർന്ന് അണക്കെട്ടിൽ നിന്നും കൊണ്ടുപോകുന്ന വെള്ളത്തിന്റെ അളവ് കൂട്ടാൻ കേരളം ആവശ്യപ്പെടുകയായിരുന്നു. ഇന്നലെ വൈകീട്ട് മുതലാണ് കൂടുതൽ വെള്ളം തമിഴ്‌നാട് അണക്കെട്ടിൽ നിന്നും കൊണ്ടുപോകാൻ ആരംഭിച്ചത്. നേരത്തെ സെക്കന്റിൽ 511 ഘന അടി വെള്ളമാണ് കൊണ്ടുപോയിരുന്നത്. ഇത് 1100 ഘന അടിയായാണ് വർദ്ധിപ്പിച്ചിരിക്കുന്നത്.

നിലവിൽ അണക്കെട്ടിന്റെ വൃഷ്ടിപ്രദേശത്ത് മഴ കുറവുണ്ട്. ഇതും തമിഴ്‌നാട് കൂടുതൽ വെള്ളം കൊണ്ടുപോകുന്നതും അണക്കെട്ടിലെ വെള്ളം ഉയരുന്നത് സാവകാശം ആക്കിയിട്ടുണ്ട്. അതിനാൽ നേരിയ ആശ്വാസത്തിലാണ് കേരളം. ജലനിരപ്പ് ഇനിയും വർദ്ധിക്കില്ലെന്നാണ് തമിഴ്‌നാടിന്റെയും പ്രതീക്ഷ.

142 അടിയാണ് അണക്കെട്ടിന്റെ സംഭരണ ശേഷി. ഈ മാസം മൂന്നിനാണ് ജലനിരപ്പ് 140 അടിയായി ഉയർന്നത്. ഇതേ തുടർന്ന് തമിഴ്‌നാട് കേരളത്തിന് മുന്നറിയിപ്പ് നൽകിയിരുന്നു.