‘ഇന്ത്യയെ കൊറോണയിൽ നിന്നും രക്ഷിച്ചത് യേശു, ഇന്ത്യയുടെ വികസന നായകനും യേശു‘: തെലങ്കാന ആരോഗ്യ ഡയറക്ടറുടെ പ്രസ്താവന വിവാദത്തിൽ- Telangana Health Director says Covid retreated due to Jesus Christ

ഹൈദരാബാദ്: ഇന്ത്യയെ കൊറോണയിൽ നിന്നും രക്ഷിച്ചത് യേശു ക്രിസ്തുവാണെന്ന് തെലങ്കാന ആരോഗ്യ ഡയറക്ടർ ശ്രീനിവാസ് റാവു. ലോകത്തെ അതിജീവനം പഠിപ്പിച്ചത് ക്രിസ്തു മതമാണെന്നും ശ്രീനിവാസ് പറഞ്ഞു.

ചൈനയിൽ വീണ്ടും ആഞ്ഞു വീശുന്ന BF.7 കൊറോണ ഉപവകഭേദം ലോകരാജ്യങ്ങളെ വീണ്ടും ആശങ്കയിലാഴ്‌ത്തുന്ന സാഹചര്യത്തിലാണ് ശ്രീനിവാസിന്റെ പ്രസ്താവന വിവാദമാകുന്നത്. ഭദ്രാദ്രി ജില്ലയിൽ ക്രിസ്മസ് ആഘോഷങ്ങളിൽ പങ്കെടുക്കവെയായിരുന്നു റാവുവിന്റെ വിവാദ പ്രസ്താവന.

ഇന്ത്യയുടെ വികസന നേട്ടങ്ങൾക്ക് പിന്നിൽ ക്രിസ്തുമതമാണ്. പലരും കരുതുന്നത് നമ്മുടെ നന്മ കൊണ്ടാണ് കൊറോണ വ്യാപനം കുറഞ്ഞത് എന്നാണ്. എന്നാൽ, വാസ്തവം അങ്ങനെയല്ല. യേശു ക്രിസ്തു കാരണമാണ് രാജ്യത്ത് കൊറോണ കുറഞ്ഞത്. ഇതായിരുന്നു റാവുവിന്റെ വാക്കുകൾ.

മാനവരാശിയുടെ നിലനിൽപ്പ് അപകടത്തിലാണ്. മറ്റനവധി ദൈവങ്ങൾ ഉണ്ടെങ്കിലും, ഭൂമിയിലൂടെ നടന്ന ദൈവം യേശുവാണ്. ജാതിമത ഭേദമില്ലാതെ ഏവരും യേശു ക്രിസ്തുവിന്റെ സന്ദേശം വരും തലമുറകൾക്ക് കൈമാറണമെന്നും ശ്രീനിവാസ് റാവു ചടങ്ങിൽ പറഞ്ഞു.