ഡ്രോണുകളില്ല, ചൈനീസ് ലൈറ്റുകളില്ല ; റിപ്പബ്ലിക് ദിനാഘോഷത്തോടനുബന്ധിച്ച് ഗുരുഗ്രാമിൽ നിരോധനാജ്ഞ

ചണ്ഡീഗഢ്: റിപ്പബ്ലിക് ദിനാഘോഷത്തോട് അനുബന്ധിച്ച് ഹരിയാനയിലെ ഗുരുഗ്രാമിൽ അതീവ സുരക്ഷ. നഗരത്തിൽ ഡ്രോണുകളും ചൈനീസ് ലൈറ്റുകളും ഉപയോഗിക്കുന്നത് നിരോധിച്ചു. സിആർപിസി 144 വകുപ്പ് പ്രകാരം ജനുവരി 26 വരെയാണ് നിരോധനാജ്ഞ പ്രഖ്യാപിച്ചത്.

ഡ്രോണുകൾ, എയർ ബലൂൺ, പട്ടം പറത്തൽ, ചൈനീസ് മൈക്രോ ലൈറ്റുകളുടെ ഉപയോഗം എന്നിവയ്‌ക്കാണ് ജില്ലാഭരണകൂടം താൽക്കാലികമായി നിരോധനം ഏർപ്പെടുത്തിയിരിക്കുന്നത്. നിയമലംഘനം നടത്തുന്നവർക്കെതിരെ കർശന നടപടി സ്വീകരിക്കുമെന്ന് ജില്ലാ മജിസ്‌ട്രേറ്റ് അറിയിച്ചു. സാമൂഹിക വിരുദ്ധ പ്രവർത്തനങ്ങളിൽ ഏർപ്പെടുന്നവർക്കെതിരെ ഐപിസി 188 വകുപ്പ് പ്രകാരം നടപടി എടുക്കുമെന്നും അധികൃതർ വ്യക്തമാക്കി.

പ്രദേശത്തെ മുഴുവൻ സ്ഥാപനങ്ങളിലെ ജീവനക്കാരുടെയും താത്ക്കാലിക താമസക്കാരുടെയും തിരിച്ചറിയൽ രേഖകളടക്കം ശേഖരിക്കാനും കമ്മീഷണർ ഉത്തരവിട്ടു.