വിരമിക്കൽ പിൻവലിച്ച് മിതാലി രാജ്; ഐപിഎല്ലിലേക്ക് തിരിച്ചെത്തുന്നു

ന്യൂഡൽഹി: ഇന്ത്യൻ വനിതാ ക്രിക്കറ്റ് ടീമിന്റെ മുൻ ക്യാപ്റ്റൻ മിതാലി രാജ് വിരമിക്കൽ പിൻവലിച്ച് കളിക്കളത്തിൽ തിരിച്ചെത്തുന്നു. മാർച്ച് ആദ്യ ആഴ്ചയിൽ വനിത ഐപിഎൽ ആരംഭിക്കാൻ ഇരിക്കേയാണ് തിരിച്ചു വരവ്. മിതാലി ഐപിഎൽ കളിക്കുമെന്നാണ് ലഭിക്കുന്ന സൂചന.

മിതാലിയുടെ തിരിച്ചുവരവ് വനിത ഐപിഎല്ലിന്റെ ആഗോള പ്രസക്തി വർദ്ധിപ്പിക്കുമെന്ന് ഐപിഎൽ വൃത്തങ്ങൾ ചൂണ്ടിക്കാട്ടുന്നു. കഴിഞ്ഞ ജുലായ് മാസത്തിൽ നടന്ന ക്രിക്കറ്റ് പോഡ്കാസ്റ്റിൽ തിരിച്ചു വരവിന്റെ ആദ്യ സൂചന മിതാലി നൽകിയിരുന്നു. കഴിഞ്ഞ വർഷം ജൂൺ 8-നാണ് മിതാലി അന്താരാഷ്‌ട്ര ക്രിക്കറ്റിൽ നിന്നും ഔദ്യോഗികമായി വിരമിച്ചത്.

നാൽപത് വയസുകാരിയായ മിതാലി എൺപത്തിയൊൻപത് ടി-20 മത്സരങ്ങൾ കളിച്ചിട്ടുണ്ട്. കൂടാതെ 232 ഏകദിനങ്ങളും 12 ടെസ്റ്റുകളും കളിച്ചിട്ടുണ്ട്.  1999ൽ, തന്റെ പതിനാറാം വയസ്സിലാണ് മിതാലി രാജ് ഇന്ത്യൻ കുപ്പായമണിയുന്നത്. വനിതാ ക്രിക്കറ്റിന്റെ ചരിത്രം തിരുത്തിക്കുറിച്ച ഇന്ത്യൻ ഇതിഹാസം എന്നാണ് മിതാലി വിശേഷിപ്പിക്കപ്പെടുന്നത്. ഇന്ത്യയെ രണ്ട് ലോകകപ്പുകളുടെ ഫൈനലിൽ എത്തിച്ച നായികയാണ് മിതാലി.