തിരുവനന്തപുരം: കോൺഗ്രസ് പാർട്ടി പദവികളിൽ നിന്നും രാജിവെച്ച് കോൺഗ്രസ് ദേശീയ സോഷ്യൽ മീഡിയ കോ-കോഡിനേറ്ററും മുതിർന്ന നേതാവ് എകെ ആന്റണിയുടെ മകനുമായ അനിൽ ആന്റണി. ബിബിസി ഡോക്യുമെന്ററി വിവാദത്തിൽ പാർട്ടി നിലപാടിന് വിരുദ്ധമായി അദ്ദേഹം അഭിപ്രായം പ്രകടിപ്പിച്ചിരുന്നു. ഇതിന് പിന്നാലെയാണ് അനിൽ പാർട്ടി പദവികൾ രാജിവെച്ചിരിക്കുന്നത്.
ബിബിസി ഡോക്യുമെന്ററിക്കെതിരെ അനിൽ ആന്റണി കഴിഞ്ഞ ദിവസം രംഗത്തുവന്നിരുന്നു. രാജ്യത്തിന്റെ പരമാധികാരത്തെ ചോദ്യം ചെയ്യുന്നതാണ് ഡോക്യുമെന്ററിയിലെ ഉള്ളടക്കമെന്ന് അദ്ദേഹം അഭിപ്രായപ്പെട്ടു. മുൻവിധിയോടെ പ്രവർത്തിക്കുന്ന സ്ഥാപനമാണ് ബ്രിട്ടീഷ് ബ്രോഡ്കാസ്റ്റിംഗ് കോർപ്പറേഷൻ എന്നും അദ്ദേഹം പറഞ്ഞിരുന്നു. അനിലിന്റെ പരാമർശത്തെ വിമർശിച്ച് കോൺഗ്രസിലെ ഒരു വിഭാഗം രംഗത്തുവന്ന ശേഷവും തന്റെ നിലപാടിൽ മാറ്റമില്ലായെന്ന് അദ്ദേഹം വ്യക്തമാക്കി.
അനിൽ ആന്റണിക്കെതിരെ രൂക്ഷ വിമർശനവുമായി കെപിസിസി അദ്ധ്യക്ഷൻ കെ.സുധാകരൻ രംഗത്തുവന്നിരുന്നു. അനിൽ ആന്റണി നിലവിൽ പാർട്ടി പദവികൾ ഒന്നും വഹിക്കുന്നില്ലെന്നായിരുന്നു സുധാകരന്റെ പ്രതികരണം. യൂത്ത് കോൺഗ്രസ് സംസ്ഥാന അദ്ധ്യക്ഷൻ ഷാഫി പറമ്പിലും അനിലിനെതിരെ കഴിഞ്ഞദിവസം പരാമർശം നടത്തിയിരുന്നു.അനി
ലിനെ പുറത്താക്കണമെന്ന് ചില യൂത്ത് കോൺഗ്രസ് നേതാക്കൾ പാർട്ടിയോട് ആവശ്യപ്പെട്ടിരുന്നു.
