നടി നിത്യ ദാസ് ഒരിടവേളയ്‌ക്ക് ശേഷം തിരിച്ചെത്തുന്ന സിനിമയാണ് ‘പള്ളിമണി’. നടി ശ്വേതാ മേനോനും പള്ളിമണിയിൽ പ്രധാനകഥാപാത്രമായി എത്തുന്നുണ്ട്. എന്നാൽ, റിലീസിനൊരുങ്ങുന്ന സിനിമയുടെ പോസ്റ്ററുകൾ പലയിടത്തും നശിപ്പിക്കപ്പെടുന്നതിനിനെതിരെ രംഗത്തു വന്നിരിക്കുകയാണ് നിത്യ ദാസ്. ഇൻസ്റ്റാഗ്രാം പോസ്റ്റിലൂടെയാണ് താരം പ്രതികരിച്ചിരിക്കുന്നത്.
‘തിരുവനന്തപുരത്ത് നിന്നുള്ള കാഴ്ചയാണ്, കണ്ണു നിറക്കുന്ന കാഴ്ച. അണ്ണാ കയ്യിൽ ക്യാഷ് ഒന്നും ഉണ്ടായിട്ടല്ല. വലിയ ആർട്ടിസ്റ്റ് ചിത്രവും അല്ല, പടം തിയറ്ററിൽ എത്തുന്നതിന് മുന്നേ ക്യാഷ് കിട്ടാൻ. ഇതൊക്കെ കടമൊക്കെ എടുത്തു ചെയ്യുന്നതാ, സത്യം. ഉപദ്രവിക്കരുത്, എല്ലാം പ്രതീക്ഷയാണല്ലോ. 24-ന് നമ്മുടെ അടുത്തുള്ള തിയറ്ററുകളിൽ എത്തും. ‘പള്ളിമണി’. ചിത്രം ഇറങ്ങുമ്പോൾ തന്നെ പോയി കയറാൻ ഇതു വലിയ സ്റ്റാർ പടമൊന്നുമല്ല എന്നുള്ളത് നിങ്ങളെ പോലെ ഞങ്ങൾക്കും അറിയാം. ഞങ്ങളുടെ പരിമിതിയിൽ നിന്നു കൊണ്ട് ഞങ്ങളും ഇങ്ങനെയൊക്കെ പബ്ലിസിറ്റി ചെയ്തോട്ടെ. ഉപദ്രവിക്കരുത് അപേക്ഷയാണ്’ എന്നാണ് നിത്യാ ദാസ് പറഞ്ഞത്.
അതേസമയം, പല വിഷയങ്ങളിലും താൻ എടുത്ത ധീരവും നീതിയുക്തവുമായ നിലപാടുകളെ എതിർക്കുന്നവരാണ് പോസ്റ്റർ കീറിയതിനു പിന്നിലെന്ന് ശ്വേതാ മേനോനും പറഞ്ഞു. എണ്ണമറ്റ വ്യക്തികളുടെ ഉപജീവനമാർഗമാണ് ഈ സിനിമാ വ്യവസായം. അതുകൊണ്ട്, ഒരു സിനിമയെ ലക്ഷ്യമിടുന്നതിനും കഠിനാധ്വാനികളായ നിരവധി ആളുകളുടെ ഉപജീവനമാർഗത്തെ വ്രണപ്പെടുത്തുകയും ചെയ്യുന്നതിനുപകരം, എന്നെ നേരിട്ട് നേരിടാൻ ഈ നികൃഷ്ടമായ പ്രവർത്തനത്തിന് പിന്നിലുള്ളവരെ ഞാൻ വെല്ലുവിളിക്കുന്നു’ എന്ന് ശ്വേതാ മോനോൻ ഫേയ്സ്ബുക്കിൽ കുറിച്ചു.
Comments