മികച്ച പ്രതിനായകനുള്ള ദാദ സാഹിബ് ഫാൽക്കേ ഇന്റർനാഷണൽ ഫിലിം ഫെസ്റ്റിവൽ പുരസ്കാരം ദുൽഖർ സൽമാന്. ‘ചുപ്പ്’ എന്ന ചിത്രത്തിലെ അഭിനയത്തിനാണ് ദുൽഖറിനെ തേടി പുരസ്കാരം എത്തിയിരിക്കുന്നത്. ആദ്യമായാണ് ഒരു മലയാളി നടന് ഈ അവാർഡ് ലഭിക്കുന്നത്. പ്രേക്ഷക പ്രീതിയും മികച്ച നിരൂപക പ്രശംസയും പിടിച്ചുപറ്റിയ ചിത്രമാണ് ‘ചുപ്പ്’. നെഗറ്റിവ് റോളിലുള്ള നായക വേഷം ഗംഭീരമാക്കിയ ദുൽഖറിനെ സിനിമാ പ്രേമികൾ കയ്യടികളോടെയാണ് സ്വീകരിച്ചത്.
ആർ ബൽകി രചനയും സംവിധാനവും നിർവ്വഹിച്ച ‘ചുപ്പ്’ സൈക്കോളജിക്കൽ ത്രില്ലർ വിഭാഗത്തിൽ പെടുന്ന സിനിമയാണ്. സണ്ണി ഡിയോൾ ആണ് ചിത്രത്തിൽ മറ്റൊരു പ്രധാന കഥാപാത്രത്തെ അവതരിപ്പിച്ചത്. ദുൽഖറിന്റെ മൂന്നാമത്തെ ബോളിവുഡ് ചിത്രമായിരുന്നു ഇത്. പൂ കൃഷി ഉപജീവനമാക്കിയ ഡാനി എന്ന നിഗൂഢതകളേറെയുള്ള ഒരു കഥാപാത്രമായാണ് ചിത്രത്തിൽ ദുൽഖർ അഭിനയിച്ചിരിക്കുന്നത്.
പ്രേക്ഷകരുടെ കണ്ണിൽ പ്രതിച്ഛായ ഭാരമില്ലാത്ത ഒരാളായിരിക്കണം ഡാനിയെ അവതരിപ്പിക്കേണ്ടതെന്ന് താൻ തീരുമാനിച്ചിരുന്നതായി സംവിധായകൻ ആർ ബൽകി നേരത്തെ പറഞ്ഞിരുന്നു. ദുൽഖറിന്റെ വേഫേറെർ ഫിലിംസ് ആണ് കേരളത്തിൽ ചുപ്പ് വിതരണത്തിനെത്തിച്ചത്. സീ ഫൈവിലൂടെയാണ് ചിത്രം ഒടിടി റിലീസ് ചെയ്തത്.
Comments