മുൻപും ഇതുപോലെ പ്രസംഗിച്ച് രാഹുലിന് കോടതി കയറേണ്ടി വന്നിട്ടുണ്ട് , മാപ്പും പറഞ്ഞിട്ടുണ്ട് ; രാഹുൽ മാപ്പ് പറഞ്ഞതിന്റെ ന്യൂസ് ലിങ്ക് പങ്ക് വച്ച് സന്തോഷ് പണ്ഡിറ്റ്

ന്യൂഡൽഹി : മാപ്പ് പറയാൻ താൻ സവർക്കറല്ലെന്ന് പറഞ്ഞ കോൺഗ്രസ് നേതാവ് രാഹുലിന്റെ പരാമർശത്തിനെതിരെ വിമർശനം ശക്തമാകുകയാണ് . അതേസമയം മുൻപും ഇതുപോലെ പ്രസംഗിച്ച് രാഹുലിന് കോടതി കയറേണ്ടി വന്നിട്ടുണ്ടെന്നും , മാപ്പും പറഞ്ഞിട്ടുണ്ടെന്നും നടൻ സന്തോഷ് പണ്ഡിറ്റ് ഫേസ്ബുക്ക് പോസ്റ്റിൽ പറയുന്നു . രാഹുൽ കോടതിയിൽ മാപ്പ് പറഞ്ഞ ന്യൂസ് ലിങ്കും സന്തോഷ് പണ്ഡിറ്റ് ഫേസ്ബുക്കിൽ പങ്ക് വച്ചിട്ടുണ്ട് .

‘ അപകീര്‍ത്തി കേസില്‍ ശിക്ഷിക്കപ്പെട്ടതിനെ തുടര്‍ന്ന് ലോക്സഭാ അംഗത്വത്തില്‍ നിന്ന് രാഹുല്‍ ജിയെ അയോഗ്യനാക്കിയല്ലോ.. അദ്ദേഹത്തിന് ഉടനെ മേൽ കോടതിയിൽ അപ്പീൽ ചെയ്യാം.. വേണമെങ്കില് പരാമർശത്തിൽ മാപ്പ് പറയാം.. ‘മോദി’ എന്നത് OBC വിഭാഗത്തിൽ പെടുന്ന വടക്കേ ഇന്ത്യയിലെ ഒരു ജാതിയാണ്.. ആ സമുദായത്തെ പ്രസംഗ മധ്യെ അപമാനിച്ച് എന്ന കേസിലാണ് കോടതി രാഹുൽ ജിയെ ശിക്ഷിച്ചത് . (കള്ളന്മാരുടെ എല്ലാം പേര് മോദിയെന്നാകുന്നത് എങ്ങനെ……? ഇതായിരുന്നു രാഹുൽ ജിയുടെ ചോദ്യം.) ഇതിന് മുമ്പും ഇതുപോലെ പ്രസംഗ മധ്യേ പറഞ്ഞ കാര്യങ്ങളിൽ ഇദ്ദേഹത്തിന് കോടതി കയറേണ്ടി വന്നിട്ടുണ്ട്.. ഇടക്ക് മാപ്പും പറഞ്ഞിട്ടുണ്ട് ‘ – സന്തോഷ് പണ്ഡിറ്റ് പറയുന്നു.

കീഴ്‌ക്കോടതി വിധിച്ച ശിക്ഷയില്‍ മേല്‍ക്കോടതി ശിക്ഷ ഇളവ് ചെയ്യുകയോ നടപടി സ്റ്റേ ചെയ്യുകയോ ചെയ്തില്ലെങ്കില്‍ വയനാട്ടില്‍ ഉപതെരഞ്ഞെടുപ്പ് നടക്കാനാണ് സാധ്യത. മേൽ കൊടതിയിൽ നിന്നും അനുകൂല വിധി കിട്ടിയില്ലെങ്കിൽ തെരഞ്ഞെടുപ്പിൽ 6 വർഷ അയോഗ്യത വരും.. അങ്ങനെ എങ്കിൽ ഇനി വയനാട് ഉപതെരഞ്ഞെടുപ്പിൽ ആരു മത്സരിക്കും ? നിലവിൽ കോൺഗ്രസിൽ ഏറ്റവും മികച്ച നേതാവിനെ വേണം വയനാട് നിർത്തുവാനെന്നും സന്തോഷ് പണ്ഡിറ്റ് പറയുന്നു.

പ്രസംഗത്തിലും , പൊതു യോഗത്തിലുമൊക്കെ പല പാർട്ടിയുടെ പല നേതാക്കന്മാരും അണികളുടെ കൈയ്യടി കിട്ടുവാൻ പലതും പറയാറുണ്ട്. ചിലർ ഭീഷണി മുഴക്കാറുണ്ട്. പൊതുവിൽ എല്ലാ നേതാക്കന്മാരും സംസാരം അല്പം ശ്രദ്ധിക്കുന്നത് നല്ലതാണെന്ന് പറഞ്ഞാണ് സന്തോഷ് പണ്ഡിറ്റിന്റെ പോസ്റ്റ് അവസാനിക്കുന്നത്.