റീലുകളിലെ ആഡംബര ജീവിത പ്രദർശനത്തിന് രാത്രിയിൽ മോഷണം; സോഷ്യൽമീഡിയ ഇൻഫ്‌ളുവൻസറായ യുവതി അറസ്റ്റിൽ

ചെന്നൈ : ആഡംബര ജീവിതം നയിക്കുന്നതിനായി പൂട്ടിക്കിടക്കുന്ന വീടുകൾ കേന്ദ്രീകരിച്ച് മോഷണം നടത്തിയ സംഭവത്തിൽ സമൂഹമാദ്ധ്യമങ്ങളിലെ ഇൻഫ്‌ളുവൻസർ പിടിയിൽ. ചെന്നൈ സ്വദേശിയായ അനീഷ കുമാരിയാണ് അറസ്റ്റിലായത്. അറസ്റ്റിന് പിന്നാലെ തന്റെ ഫോട്ടോ മാദ്ധ്യമങ്ങൾക്ക് നൽകരുതെന്നും പ്രശസ്തിയ്‌ക്ക് കോട്ടം തട്ടുമെന്നും യുവതി അഭ്യർത്ഥിച്ചതായി പോലീസ് പറഞ്ഞു.

സമൂഹമാദ്ധ്യമത്തിലെ റീലുകളിൽ ആഡംബര ജീവിതം കാണിക്കുന്നതിന് വേണ്ടിയാണ് താൻ മോഷ്ടിച്ചതെന്ന് യുവതി സമ്മതിച്ചതായി പോലിസ് അറിയിച്ചു. കഴിഞ്ഞ ആഴ്ചയിൽ ചെന്നൈയിലെ പെരുങ്കളത്തൂരിനടുത്ത് ബൂദ്ധർ നഗറിലൂള്ള പൂട്ടിക്കിടന്ന വീട്ടിലാണ് മോഷണം നടത്തിയത്. വീട്ടിൽ ആളില്ലാത്ത തക്കം നോക്കി വീട്ടിൽ കടന്ന യുവതി 3 പവന്റെ സ്വർണാഭരണങ്ങളും 10,000 രൂപയും മോഷ്ടിക്കുകയായിരുന്നു. വീട്ടുടമ തിരികയെത്തിയതോടെയാണ് മോഷണ വിവരം അറിയുന്നത്. പിന്നാലെ പോലീസ് സ്‌റ്റേഷനിലെത്തി പരാതി നൽകുകയായിരുന്നു.

അന്വേഷണത്തിന്റെ പ്രാഥമിക ഘട്ടത്തിൽ സമീപ പ്രദേശങ്ങളിലെ മുപ്പതിലധികം സിസിടിവി ക്യാമറകൾ പോലീസ് പരിശോധിച്ചു. ഇങ്ങനെയാണ് നമ്പർ പ്ലേറ്റില്ലാത്ത സ്‌കൂട്ടറിലെത്തിയ യുവതിയാണ് മോഷണം നടത്തിയത് എന്ന നിഗമനത്തിലെത്തിയത്. തുടരന്വേഷണത്തിൽ യുവതി പോലീസ് പിടിയിലാവുകയായിരുന്നു. മോഷ്ടിച്ച സ്വർണാഭരണങ്ങൾ യുവതിയുടെ വീട്ടിലെ ഫ്രീഡ്ജിൽ നിന്ന് പോലീസ് കണ്ടെടുത്തു. യുവതിയെ മജിസ്‌ട്രേറ്റിന് മുന്നിൽ ഹാജരാക്കി റിമാൻഡ് ചെയ്തു.