മൂന്ന് കോടിയുടെ അനധികൃത അടയ്‌ക്ക അസം റൈഫിൾസ് പിടികൂടി

ഐസ്വാൾ: മിസോറാമിൽ മൂന്ന് കോടി രൂപ വിലമതിക്കുന്ന അനധികൃത അടയ്‌ക്ക പിടികൂടി. ചാമ്പൈയിലെ ജനറൽ ഏരിയ സോട്ട്ലാങിൽ നിന്നാണ് അടയ്‌ക്കയും കടത്ത് സംഘത്തെയും പിടികൂടിയത്. 536 ചാക്കുകളിലായിട്ടായിരുന്നു അടയ്‌ക്ക കടത്താൻ ശ്രമിച്ചതെന്ന് ഉദ്യോഗസ്ഥർ അറിയിച്ചു. അസം റൈഫിൾസിന്റെയും കസ്റ്റംസ് വകുപ്പ് ചാമ്പൈയുടെയും സംയുക്ത സംഘമാണ് കടത്ത് സംഘത്തെ പിടികൂടിയത്.

കസ്റ്റംസ് ഉദ്യോഗസ്ഥർക്ക് ലഭിച്ച രഹസ്യ വിവരത്തെ തുടർന്ന് അതിർത്തി മേഖലകളിൽ കർശന പരിശോധന നടത്തിയിരുന്നു. ഇതാണ് അടയ്‌ക്ക കടത്ത് കണ്ടെത്താൻ സഹായിച്ചത്. പിടികൂടിയ അടയ്‌ക്ക കൂടുതൽ നിയമ നടപടികൾക്കായി ചാമ്പൈയിലെ കസ്റ്റംസ് വകുപ്പിന് കൈമാറിയതായി അസം റൈഫിൾസ് ഉദ്യോഗസ്ഥർ അറിയിച്ചു.

സംസ്ഥാനത്ത് മുൻപും സമാനമായ കള്ളക്കടത്ത് കേസുകൾ റിപ്പോർട്ട് ചെയ്തിട്ടുണ്ട്. അസം റൈഫിൾസ് ദിവസങ്ങൾക്ക് മുൻപ് ചാമ്പൈയിലെ ത്ലാങ്‌സാമിൽ നിന്ന് 39.20 ലക്ഷം രൂപ വിലമതിക്കുന്ന 70 ചാക്ക് അനധികൃത അടയ്‌ക്ക പിടികൂടിയിരുന്നു. സംസ്ഥാനത്ത് പരിശോധന കൂടുതൽ ശക്തമാക്കിയിട്ടുണ്ടെന്ന് ഉദ്യോഗസ്ഥർ അറിയിച്ചു.