ന്യൂഡൽഹി: റോസ്ഗർ മേളയുടെ ഭാഗമായി പ്രധാനമന്ത്രി 71,000 ഉദ്യോഗാർത്ഥികൾക്കുള്ള അപ്പോയിൻമെന്റ് ലെറ്ററുകൾ നൽകും. ഏപ്രിൽ 13ന് വീഡിയോ കോൺഫറൻസിലൂടെയാണ് അദ്ദേഹം ഉദ്യോഗാർത്ഥികളെ അഭിസംബോധന ചെയ്യുക എന്ന് പ്രധാനമന്ത്രിയുടെ ഓഫീസിൽ നിന്ന് പുറത്തുവിട്ട പ്രസ്താവനയിൽ പറഞ്ഞു.
ട്രെയിൻ മാനേജർ, സ്റ്റേഷൻ മാസ്റ്റർ, സീനിയർ കൊമേഴ്സ്യൽ കം ടിക്കറ്റ് ക്ലർക്ക്, ഇൻസ്പെക്ടർ, സബ് ഇൻസ്പെക്ടർ, കോൺസ്റ്റബിൾ, സ്റ്റെനോഗ്രാഫർ, ജൂനിയർ അക്കൗണ്ടന്റ്, തപാൽ അസിസ്റ്റന്റ്, ഇൻകം ടാക്സ് ഇൻസ്പെക്ടർ തുടങ്ങി കേന്ദ്ര സർക്കാരിന്റെ വിവിധ തസ്തികകളിൽ രാജ്യത്തുടനീളം തിരഞ്ഞെടുക്കപ്പെടുന്നവർക്കാണ് തൊഴിൽ ലഭിക്കുക. ടാക്സ് അസിസ്റ്റന്റ്, അസിസ്റ്റന്റ് പ്രൊഫസർ, ടീച്ചർ, ലൈബ്രേറിയൻ, നഴ്‌സ്, പ്രൊബേഷണറി ഓഫീസർമാർ, പിഎ, എംടിഎസ് തുടങ്ങിയ തസ്തികകളിലും നിയമനം നൽകും.
10 ലക്ഷം പേർക്ക് തൊഴിൽ നൽകാൻ കഴിയും എന്ന പ്രതീക്ഷയിൽ ആരംഭിച്ച പദ്ധതിയാണ് റോസ്ഗർ മേള. പുതിയ തൊഴിൽ അവസരങ്ങൾ ആരംഭിക്കുന്നതിനായുള്ള പ്രധാനമന്ത്രിയുടെ സ്വപ്‌ന പദ്ധതികൂടിയാണിത്. യുവാക്കൾക്ക് അവരുടെ ശാക്തീകരണത്തിനും ദേശീയ വികസനത്തിനുള്ള പങ്കാളിത്തത്തിനും അർത്ഥവത്തായ സംഭാവനകൾ നൽകാൻ സാധിക്കുമെന്ന വിലയിരുത്തലിൽ പുത്തൻ തൊഴിലവസരങ്ങൾ സൃഷ്ടിക്കുന്നതിനുള്ള കേന്ദ്രസർക്കാർ പദ്ധതിയാണിത്.
വിവിധ സർക്കാർ വകുപ്പുകളിലെ പുതിയ നിയമനങ്ങൾക്കായുള്ള ഓൺലൈൻ ഓറിയന്റേഷൻ കോഴ്സായ ‘കർമയോഗി പ്രാരംഭ്’ പദ്ധതിയിലൂടെ സ്വയം പരിശീലനത്തിനുള്ള അവസരവും ലഭ്യമാക്കും.
Comments