തിരുവനന്തപുരം: സംസ്ഥാനത്ത് താപനില ഉയരുമെന്ന് മുന്നറിയിപ്പ്. ഇത് സംബന്ധിച്ച് കാലാവസ്ഥ നിരീക്ഷണ കേന്ദ്രമാണ് മുന്നറിയിപ്പിറക്കിയത്. അഞ്ച് ജില്ലകളിലെ താപനില ഉയരുമെന്നും ഉത്തരേന്ത്യയിലെ ഉഷ്ണതരംഗ സമാന സാഹചര്യമാണ് കേരളത്തിലും ചൂട് കൂടാൻ കാരണമെന്നും റിപ്പോർട്ടിലുണ്ട്. പകൽ 11 മണി മുതൽ ഉച്ചയ്ക്ക് മൂന്ന് വരെ സൂര്യപ്രകാശം തുടർച്ചയായി ഏൽക്കുന്നത് ഒഴിവാക്കണമെന്നാണ് ദുരന്തനിവാരണ അതോറിറ്റിയുടെ മുന്നറിയിപ്പ്. നിർജ്ജലികരണം ഉണ്ടാകാം എന്നും അതിനാൽ ധാരാളം വെള്ളം കുടിക്കണമെന്നും മുന്നറിയിപ്പിലുണ്ട്.
ഓട്ടോമാറ്റിക്ക് വെതർ സ്റ്റേഷൻ കണക്ക് പ്രകാരം പാലക്കാട് എരിമയൂരിൽ ഇന്നലെ 45.5 ഡിഗ്രി സെൽഷ്യസാണ് ഉയർന്ന താപനിലയായി രേഖപ്പെടുത്തിയത്. പാലക്കാട് മിക്ക സ്റ്റേഷനുകളിലും താപനില 40 ഡിഗ്രിക്ക് മുകളിൽ രേഖപ്പെടുത്തിയിരുന്നു. തുടർച്ചയായി 40 ഡിഗ്രിക്ക് മുകളിൽ തന്നെ താപനില തുടരുകയാണെങ്കിൽ ഉഷ്ണതരംഗം പ്രഖ്യാപിക്കാനാണ് സാധ്യത. പാലക്കാട്, തൃശ്ശൂർ, കണ്ണൂർ ജില്ലകളിൽ താപനില നാല് ഡിഗ്രി സെൽഷ്യസ് വരെ ഉയരുമെന്നാണ് അറിയിപ്പ്. കോഴിക്കോട്, കോട്ടയം ജില്ലകളിൽ രണ്ട് മുതൽ മൂന്ന് ഡിഗ്രി സെൽഷ്യസ് വരെയും താപനില ഉയരുമെന്നും കാലാവസ്ഥ റിപ്പോർട്ടിലുണ്ട്.
